معلشي اصل انا خلااااااص جبت اخري من كل الاطراف
المجلس العسكري والجيش والشرطة وحكومة والنشطاء ومن الشعب
اللي انا مبسوط منهم صح البلطجية
حد يسالني يقولي ليه؟
اقولك ومطولش عليك قول طول
هناك الكثير من الاسئلة تعصف برأس اهم شخص في الدولة المصرية هو المواطن
لقد قامت ثورة فلماذا لا تتحسن الاحوال
وانا هنا لا اتكلم عن التغيير فالتغيير حدث بالفعل ليس بسقوط مبارك ومحاكمة رجاله وسجن اولاده
ولكني اتحدث عن تحسن الاحوال
وبالنسبة للمواطن المصري (الشعب = انا وانت يعني ) التحسن ليس في شئ معين لكن في اي شئ لكي يحتج به امام الناس ويقول في زمن مبارك كنا لا نستطيع ان نفعل كذا اما الان بعد الثورة المباركة اصبحنا نستطيع ان نفعله
لكنه الشئ الوحيد الذي يري فيه المواطن التغيير هو بالنسبة لجماعات او افراد كانوا محظورين بشكل جزئي او كلي ورفع عنهم الحظر بينما هو حاله اسوأ من ذي قبل مما يجعله يقول " طيب مبارك كان حلو بقي " ماهي مافرقتش
لكن المصيبة انها فرقت لان فيه انفلات امني غير طبيعي علي حد علمي من اصدقاء في مصر
وهنا يحدث شبه عواصف وزلازل وبراكين في دماغ العبد لله
فالكثير من الاسئلة في راسي واعلم انها في راس الكثير من الشعب لا يربط بينها الا ان هناك شئ من اثنين اما المؤامرة واما الهطل (ودا نسبة اعلي بكتير من الغباء) السياسي
----
سؤال الانفلات الامني
ليه فيه انفلات امني؟ ( اوعي تقولي مفيش )
الان لا يوجد بلطجية منفردين بل عصابات مسلحة واحتمال في وقت قريب تقلب مليشيات ( ائتلاف عصابات يعني ) ، اللي عاوز يعمل حاجة بيعملها ، اللي بيخالف القانون بيخالف قدام الظابط والظابط مبيقدرش يفتح بقه ، الباعة الجائلين قفلوا الطرق ، الضباط مش عاوزين يشاركوا في حفظ الامن
ناخدها حتة حته
- عصابات مسلحة مبيتقبضش عليها ليه ......... بنحاول بس الناس مش بتساعدنا ..... طيب من امتي يعني الناس المفروض يعني تكتفه وتسلمهولكم ...... الظابط خايف يستعمل القوة في القبض ع المتهم .... ليه الضابط مش دارس قانون وعارف الحالات المسموح فيها استخدام القوة ....... اصل الناس هتيجي تضرب الظابط ......دا بقي نصب علني لانكم في عز ايام الثورة وضرب النار ع الناس كنتوا واقفين ودول كانوا ملايين في شوارع الجمهورية وميادينها ........ ولو افترضنا ان عشرة في المية من الناس دي بقت بلطجية فعدد الشرطة زي ما هم بل وضيف عليهم عدد الجيش .........اصل الضباط نفسيتهم تعبانة ومش عاوزين ينزلوا عشان هيعدموا امين شرطة قتل متظاهرين ...... يبقي الظباط مش مقتنعين بالقانون اللي المفروض بيحموه ..... طيب يقدموا استقالة ........ قدم 6000 ظابط استقالة ورفضوها ........ليه رفضوها .......... اصل هيبقي فيه انفلات امني .......... طيب ما هو احنا في ايه ..........طيب يدربوا ناس مكانهم وينزلوهم .......... هياخد وقت ......... ليه ؟ هو ضابط الشرطة بيدرس ايه ؟...........قانون وسلاح وحاجات الدفاع عن النفس ......... طيب مش هنعرف نطلع 6000 من خريجين حقوق لغاية سن 30 سنة ........تدريبهم هياخد وقت ؟ .......... لا ادوهم دورة في استعمال السلاح بس .......الموضوع مش سلاح بس .........الجيش معاهم وفيه فرق متخصصة في الجيش لكدا هتساعدهم
طيب الوزير مبيعملش كدا ليه؟؟؟؟؟ طيب مبيقلوهوش ليه ؟؟؟؟
طيب من نظرية المؤامرة :
الانفلات عشان الناس تعيط وتقول الحقنا ياجيش ودا بيحصل بالفعل وبيجمعوا توقيعات للمجلس العسكري عشان يطول
طيب هو يعني هيخلي ناس يعملوا بلطجية .........كفاية انه يسيب وزير ضعيف محترم لكن ضعيف وقيادة الدرجة التانية فيهم ناس زبالة ...... ويخلي اعداد الجيش قليلة وميستدعيش نسبة من الاحتياط عشان يساعد في حفظ الامن وفي نفس الوقت الناس تلعن ابو الديمقراطية
-----------
بالنسبة للنشطاء :
النشطاء دول اجدع ناس معظمهم امتياز في الهطل او تقدر تقول معاقين ذهنيا
يعني يطلعوا ف التلفزيون ويشتموا ف الكل ويحسسوا الشعب انه ولا فاهم اي حاجة
واحنا شعبنا من النوع اللي حتي لو مش فاهم لازم تقول يا احسن شعب علي وجه الارض
طيب يعني النشطاء يعملولك ايه
النشطاء طلعوا مظاهرات عشان فلسطين ......... الشعب العادي متعاطف نسبيا مع فلسطين
لكن متعاطف مع نفسه اكتر
يعني تقولي نروح نعمل مظاهرة عند السفارة عشان نطرد السفير وننزل العلم تبقي بتخسر من رصيدك عند الشعب
وشطبت الرصيد لما قولت هزحف علي فلسطين
يعني انته عاوز تدخلنا في حرب رسمي
يبقي المجلس العسكري المفروض يظبطهم
طيب المجلس العسكري سابهم ليه وقمعهم ليه اصلا
نظرية المؤامرة بقي :
احنا بنسيب الديمقراطية بس هيدخلونا في حرب واحنا عاوزين الانتاج وهنطلعهم من السجن باحكام مع ايقاف التنفيذ عشان تعرفوا اننا ديمقراطيين بس خدوا بالكم انتوا سوابق لان محكوم عليكم
طيب ياعم النشط طالع بعد اما خسرت رصيدك وعاوز خدمة سلفني شكرا ورايح تقول الثورة التانية بعد جمعة كانت اعدادها علي اكبر تقدير 5 الاف وعلي اقل تقدير 150 واحد
طيب يعني اذا بليتم فاستتروا مش تبقي اتفضحت في الجمعة اللي قبليها وجاي بقي تتعري في الجمعة دي
المصيبة مش هتتعري وبس دا انته بتقول شكل للبيع يعني الشعب كله بيقول مش عاوز مجلس رئاسي وانا واثق في العسكري وانته تقول لازم رئاسي
طيب ما اي واحد هيقولك انته بتاخد فلوس وبتدور علي مصالحك وعاوز مرشحك يبقي ف المجلس الرئاسي
طيب اخروا الانتخابات ........ دي الناس فاكرة اصلا ان الانتخابات لما تيجي البلد هتبقي فل
طيب المؤامرة :
انك هتتطلع بعدد نص العدد اللي فات وتبقي اتعريت يجيك الضربة القاضية في الجمعة اللي بعديها عشان انته استنفذت رصيدك من الجمع دوري انا بقي خد جمعة تاييد للمجلس العسكري واحنا عملنا بروفات عند المنصة واشرب بقي ياحلو شيك علي بياض للمجلس العسكري عاوزين امن واستقرار واعدم اللي شكل امه ميعجبكش
طيب انا كان المفروض اسكت يعني (انا الناشط ):
لا كان المفروض عملنا جروبات مش ع الفيس بوك
جروبات انتوا بتوع مساعدة رجال الاعمال وانتوا بتوع مساعدة رجال الشرطة وانتوا بتوع الحوار الوطني بس يبقي صوتكم واطي ومحترمين وانتوا بتوع النضافة ف المحافظات
كان ساعتها انته بتشارك في كل حاجة واللي هتشوفه غلط هتقول والله انا شغال معاكم بس دي غلط
----------
المحبوسين :
طبعا المحبوسين الناس بتطلع بكفالة والناس بتاخد براءة ومبارك متسجنش ومفيش محاكمات واحنا عملنا ثورة
تمام عداك العيب
انته دلوقتي هتقعد علي قد كدا تهيص وبس من غير ما تشتغل وتقول المحاكمة
لا دا انا في مليونية الانتاج في العاشر بنساعد عمال المصانع وواخدين ميه وعصير ومش مستنين الجيش يجيب لنا ميه وعصير واحنا هناك بنسال العمال ايه رايكم نحاكم مبارك ولا لا
مش هنعتصم لغاية ما يتحاكم وياتحاكموه يانوقف البلد
طيب المؤامرة :
ان الموضوع مقصود ان يحصل الحاجات دي وان مبارك كدا كدا يا يتحاكم يا يتقتل
كل المجلس العسكري عارفين ان الراجل يعرف الاسرار الوسخة قبل الحلوة ولو هما سلام هيحاكموه ولو اوساخ هيقتلوه
يعني مش هيسبوه دا مش وارد
طيب اصل فيه ضغط من دول عربية
الدول العربية ميفرقش معاها مبارك ومبيحلموش بيه في النوم ولا يفرق معاهم
فلوسه هناك
خير وبركه هيموت وفلوسه تدخل دولهم
يتحبس فلوسه عندهم
هما ماسعدوش الا البحرين واهم حاجة عندهم الامن القومي مش بيحبوا مبارك عشان جان لا عشان كان بيقولهم انتوا الامن القومي بتاعي طبعا نصاب
مبيفتكروش خير لحد يعني
------
المصريين بالخارج :
بصراحة دي النقطة الوحيدة اللي بتأيد نظرية المؤامرة لانها ممنوعة بدون سبب الا التاثير علي القوة السياسية لبعض مرشحي الرئاسة والانتخابات التشريعية
-----
الاقتصاد:
طبعا اللي مبيشوفش من الغربال يبقي اعمي مش زي ما سمعت الاخوان وابراهيم عيسي بيشككوا في تصريحات المجلس العسكري عن الوضع الاقتصادي
اذا كان ايام الاستقرار كان خيبتنا ما وردتش علي حد
دلوقتي في غياب الامن واعتصامات وخوف من الاستثمار وهتقولي الاقتصاد بيتحسن ولا ثابت حتي
يعني اظن اللي بيشكك في المشكلة الاقتصادية اعمي
الخلاصة
لو مؤامرة : يبقي هنخسر تاني واحد من نوعية اللواء محمد نجيب وهنشوف واحد تاني زي عبدالناصر او السادات
المشكلة ان عبدالناصر كان فيه فلوس ايام الملك وعرفوا يظبطوا البلد بيها
السادات كان بداية عصر انفتاح
دلوقتي معندناش حاجة يعني البلد حالها هيبقي هباب وهتستكمل مسيرة الافلاس اللي بداها مبارك
اللي مش مؤامرة : الشعب هيطلبها من المجلس العسكري لان الشعب دلوقتي عاوز حد يعمل اي حاجة المهم يسيطر ع البلد
في الحالتين : النشطاء في الباي باي ويبقي الشعب والجيش ايد واحدة وتبقي مصر زي ما هي ومش هتتقدم لان مثقفيها او الكثير من مثقفيها جاهلين
صحيح كنت هنسي
تحية الي البلطجية الذين استطاعوا ان يتجمعوا تحت لواء واحد نابذين جميع خلافتهم ولم ينساقوا وراء الفتنة الطائفية ولا الخلافات الايدولوجية وتقدموا الي هدفهم بل وطوروه وشكلي هباركلهم اما يعملوا مليشيات
ليست هناك تعليقات:
إرسال تعليق