حقيقة ستار اكاديمي ( الاكاديمية ) و مالحوم اخنوف

الاشاعة : 

ايـــــــــــه دااااااااااااااا يا جمااااااااااااااااااعه؟؟؟؟؟؟؟؟

؟؟؟؟؟؟ بجد مش مصدقه خاااااااااالص انا كرهت البرنامج دا بجد بليييييييز اقروا الكلام للاخر :O :O :O
__________________________________________________________

في لقاء أجراه شخص يعمل في قناة اسرائيليه مع الدكتور الاسرائيلي {مالحوم اخنوف }صاحب فكرة : ستار أكاديمي !!

كان هذا اللقاء بالحرف الواحد »
سأله السؤال الأول :
ماهو شعورك اليوم وأنت حققت أكبر أمانيك ؟وهي ستار أكاديمي في عقر دار الاسلام

فأجاب شعور لا يوصف ولكن أخذ من عمرنا الكثير حتى تمكنا من الوصول الى غايتنا !!

فسأله ما قصدك بأخذ من عمرنا الكثير
فقال نعم جلسنا سنين حتى تمكنا من ادراجه في الدول الغربيه " ثم الى الدول العربيه وكنا نعلم ان فكرتنا ستتحول الى أنجح خطه في مسيرة الدوله الاسرائيليه !!

فسأله لماذا كنتم متأكدين انكم ستنجحون بهذه الفكره ؟

فقال لأننا نعلم ان المسلمين اليوم ابتعدوا عن دينهم وفي نفس الوقت الشباب المسلم أصبح يميل الى الالتزام الاسلامي الذي لو كبر سيقضي على دولتنا !!

فسأله لماذا حرصتم على ان يكون ستار أكاديمي هو وسيلة للوصول للمسلمين ؟

فقال لأننا نريدهم ان يبتعدوا عن دينهم
فسأله ماذا تخططون اليوم للهجوم على الاسلام بعد ستار أكاديمي ؟

وبكل تحدي ووقاحة قال نخطط لغزو البنات المسلمات :

فسأله لماذا البنات المسلمات وليس الرجال ؟

فقال لأننا نعلم إذا انحرفت{ المسلمه } سينحرف جيل كامل من المسلمين وراءها ?

فسأله مره اخرى بماذا تصفون غزوكم للمرأة المسلمة ؟

فقال نحن اليوم نحرص على غزو المسلمه وافسادها عقليا وفكريا وجسديا أكثر من صنع الدبابات والطائرات الحربية !!

فسأله وهل لكم يد في ستار أكاديمي المقامه حاليا في لبنان ؟

فقال بالتأكيد فنحن نتبرع كل يوم لهم بمبلغ كبير من المال وهي تحت اشرافنا باستمرار !!

وفي نهاية اللقاء ماذا تقول لامتنا الاسرائيليه وتبشرهم ؟

أقول لهم ان يستغلوا نوم الأمة الاسلامية فانها أمه إذا صحت تسترجع في سنين ما سلب منها في قرون

حسبي الله ونعم الوكيل

share ya gamaaa3aaaaaa plZzzz lel kalam daaaa

الرد علي الاشاعة :
التعريف بالبرنامج :

ستار اكاديمي : من فئة البرامج الواقعية و تم تقديمه لاول مرة في اسبانيا عام 2001 تحت اسم Operación Triunfo علي شبكة التلفزيون الاسباني كان يتم الغناء فيه باللغة الاسبانية والانجليزية وقليل من الايطالية والبرتغالية كما عرف البرنامج باسم OT ثم نقل البرنامج ليعرض علي شبكة تلفزيون تجارية اسبانية تسمي تليسينو Telecinco اما المسئولين عن البرنامج Toni Cruz, Josep Maria Mainat ,Joan Ramon Mainat  جون رامون مينات و جوزيف ماريا مينات وتوني كروز من انتاج شركة جست ميوزيك Gestmusic وهي الفرع الاسباني من شركة انديمول 

ودخل الي فرنسا تحت اسم اكاديمية النجم star academy  عام 2001 ايضا لكن بعد اسبانيا ثم دخل الي بريطانيا 2002

تحت اسم fame academy اكاديمية الشهرة علي شبكة بي بي سي من انتاج انديمول 

المصدر :
http://en.wikipedia.org/wiki/Operaci%C3%B3n_Triunfo
http://en.wikipedia.org/wiki/Endemol
http://en.wikipedia.org/wiki/Fame_Academy

ملحوظة : علي رابط ويكيبيديا الخاص ببرنامج ستار ميكر الفرنسي بيقول انه سبق البرنامج الاسباني بيومين

عموما مش هيفرق معانا مين سبق التاني ولكن الاغلب انه في اسبانيا لان الفكرة اصحابها من عندهم

طيب نعكس اسلوب البحث :

ندور علي البشمهندس : مالحوم اخنوف اللي بيقولوا عليه صاحب الفكرة

لما بحثنا بالعربي مش موجود الا الموضوع علي منتديات وطبعا انتوا عارفين المنتديات " بيحوروا في اي هتش "

بحثنا بالانجليزية عن malhom aknov والمفروض يبقي راجل مشهور علي راي الرد في الصورة اللي تحت علي سؤال عن ( مالحوم اكنوف ) في اسئلة جوجل 

لقينا في جوجل اسمه علي موقع فانوس تحت اشاعات واخبار ستار اكاديمي

المصدر
http://www.fanoos.com/staracademy8/star_academy_israeli_creation.html

وانا ببحث اعجبني اني في البحث لقيت الموضوع بالانجليزية والالمانية

مثلا منتدي سعودي اسمه المتحدون للدراجات النارية ناطق او بالاحري مكتوب بالالمانية 

http://www.ubtksa.com/vb/7229-a.html?language=de

ومترجم للانجليزية ايضا في احد التعليقات علي خبر خاص بستار اكاديمي

http://zawaya.magharebia.com/ar/logincomment?commentor_id=98

ومفيش حاجة تانية عن الراجل او صلته بستار اكاديمي فتقريبا الراجل اخترع الفكرة ومرضيش يعمل اي اعلان لنفسه او ينسبها لنفسه الا في اللقاء الفيسبوكي الخطير اللي بيهاجم فيه الاسلام بشدة وتقريبا مرضيش اللقاء دا يتعرض الا علي العرب عشان يعرفهم هو بيحبهم ازاي

طيب نشوف اليوتيوب بما انه لقاء قابل مقدم في التلفزيون الاسرائيلي -----> ملقناش حاجة ليها علاقة بالموضوع الا اغنية " هما ملحوم بينا ياليل " !!!!!


ملحوظة هامة جدا :

انا من اكبر كارهي البرنامج دا لانه بصراحة زبالة ... ومبيحترمش المراة العربية ولا الرجل العربي يعني ايه راجل يقعد يتدلع وسط الحريم ولا بنت - المفروض انها بنت ناس - تظهر في اوضاع ا تليق علي شاشات التلفزيون .... صدقوني حتي اوروبا وامريكا فيه عائلات ترفض بشدة المواضيع الحقيرة دي 

طيب انا ليه دورت :

انا دورت ورا الموضوع لاني مبحبش الاكاذيب وان كانت متقنة وان كان هدفها نبيل فهي تسئ للهدف نفسه اكتر ما تسئ لقائلها فالغرض من الموضوع ممكن يكون حد من اتنين اللي اخترع الموضوع دا 

اما انه شخص مسلم ومعجبوش البرنامج فقال الغاية تبرر الوسيلة واحب اقوله انته غلطان لان غير المسلمين هيضحكوا علينا ويقول شوفوا المسلمين بيشتغلوا نفسهم ومعيشين نفسهم في الوهم

او شخص غير مسلم اخترعها ليستغل ضعاف المسلمين ونبقي تريقة علي منتدياتهم
طيب ليه انتشرت :
احنا للاسف كمسلمين عموما وعرب خصوصا بنحب مبدأ الشماعة 

يعني احنا فقرا عشان امريكا بتحاربنا ومعندناش تعليم عشان اسرائيل بتحاول توقف نهضتنا وبنمرض عشان اسرائيل حاطة مش عارف ايه في الاكل

لكن الحقيقة ان احنا فقرا عشان مبنشتغلش بما يرضي الله ومعندناش تعليم كويس لاننا اعتمدنا علي الحفظ واننا ناخد شهادة في اي حاجة عاوزين وظيفة وننام في المكتب وبنمرض لان التعليم عندنا تعبان

منكرش ان الكثير بيحاولوا ياثروا علي نهضة المسلمين ويوقفوها لكن المسلمين انفسهم بيساعدوهم

اتمني ان قبل ما ننشر اي خبر نتأكد كويس مش مجرد نعمل شير او كوبي وبيست عشان ننشر حاجة منعرفش حقيقية ولا كدب

يالا مستنين الاشاعة الجاية

متي يحصل الاطباء البيطريين علي حقوقهم ؟؟

- يعني ايه طبيب البيطري؟

يعني بني ادم درس في مراحل التعليم المختلفة واخد بكالوريوس طب بيطري ( خمس سنوات دراسة باللغة الانجليزية ) اصل الناس فاكراه بالعربي

- بيدرس ايه في البكالوريوس بتاعه دا مش فراخ وحيوانات ؟

بيدرس 29 كورس من اول التشريح بتاع الحيوانات لغاية الباطنة والجراحة وبتزيد في بعض الكليات حسب نظامها لكن عمرها ما تقل عن كدا

- طبعا دراسته ملهاش علاقة بالطب البشري ؟

بيدرس حاجات ليها دعوة زي الامراض المشتركة بين الانسان والحيوان كمان بيدرس علم الفيروسات والبكتريا ودي غالبا مبتفرقش بين انسان وحيوان وبيدرس تاثيرها ع الاتنين كمان بيدرس مادة اسمها هيستولوجي يعني علم الخلية الطبيعية وكمان حاجة اسمها باثولوجي ودي بتتكلم عن التاثير المرضي اللي بيظهر في الخلية ...... طبعا الخلية في الانسان والحيوان واحدة

- طيب ايه يعني اما يدرس حاجات ليها علاقة بالطب البشري هو كل واحد بيدرس حاجة ليها دعوة بيه هيشتغل مع البشر؟

 فعلا كلامك سليم بس الاطباء البيطريين بيشتغلوا مع البشر ؟؟؟؟!!!!

ايوا فعلا بيشتغلوا مع البشر وكمان في التشخيص لامراضهم

- دا انته بتهزر بقي ؟

لا والله بتكلم بجد .... تعرف ان فيه اطباء بيطريين عندهم معامل تحليل باثولوجي ودي ادق حالات التشخيص وناس عندها معامل تحاليل طبية عادية بتاعة الدم والبول والبراز ومزارع البكتريا لو تسمع عنها

- ايه معامل باثولوجي دي ؟

دي معامل بعيد عن السامعين بتفحص الاورام ويحددوا اذا كان ورم حميد ولا خبيث يعني سرطان ولا ايه

- طيب يعني الطبيب البيطري دا مش دكتور بهايم قصدي حيوانات وبس ؟

لا طبعا لان الطبيب البيطري زي ما ما انا قولتلك بيشتغل في حاجات كتيره

- زي ايه ؟

شوف يا سيدي عندك مندوبين الادوية البشرية ودول شغلانتهم يشرحوا للاطباء البشريين الدواء البشري بيعمل ايه واعراضه الجانبيه

- ياعم انته هتشتغلني ؟

لا والله بتكلم بجد ..... زمان كان الاغلبية في المندوبين هما الصيادلة وقليل من البشري بس دلوقتي الاغلبية هما الاطباء البيطريين

- طيب يعني بشتغلوا مندوبين وعلاج حيوانات وبس والمعامل بس ؟

بص ياسيدي الاطباء البيطريين بيشتغلوا مندوبين دعاية ادوية بشرية ومندوبين دعاية ادوية بيطرية ومعامل تحاليل طبية بشرية ومعامل تحاليل طبية بيطرية وفي رقابة الجودة علي مصانع المنتجات الحيوانية زي اللانشون والبرجر وفي المجازر عشان يكشفوا علي اللحوم الدبايح وفي المطارات عشان الحيوانات الاليفة اللي بتدخل البلد لانها ممكن تكون شايلة امراض وكمان في المواني عشان يكشفوا علي المنتجات اللي بتدخل البلد من اصلي حيواني زي اللحوم والفراخ وكمان بيشتغلوا في حدائق الحيوانات وكمان بيشتغلوا في الشرطة عشان الكلاب البوليسية اللي بتكشف المخدرات والمتفجرات والخيول وفي الجيش عشان الكلاب الحربية ودي شعبة في الجيش وكمان بيشتغلوا في الوحدات البيطرية اللي بتبقي في الريف وفي المزارع الكبيرة زي مزارع جهينة بتاعة الالبان كمان بيبقوا موجودين لمكافحة الامراض المشتركة بين الانسان والحيوان

- طيب ما هم فلة اهم امال بيقولوا عاوزين اضراب ومسيرة ليه ويقولوا عاوزين حقوقنا ؟

اقولك ..... انته تعرف ان الطبيب البيطري بيدرس خمس سنوات زي صيدلة واسنان ومع كدا ملوش حق التوظيف في الحكومة مع ان فيه عجز في اعداد الاطباء البيطريين

انته تعرف كمان ان حصل موضوع انفلونزا الطيور وانفلونزا الخنازير ومع كدا الحكومة مفكرتش تعين اي حد او حتي تهتم بتحسين اوضاعهم

كمان تعرف ان النقابة بتاعتهم اللي موجودين فيها وماسكينها معظمهم مرتاح ماديا ومش فارق معاه الشباب 

تعرف ان اللحمة بقت غالية كدا ومفكروش ايه السبب في كدا غير نقص الثروة الحيوانية وعشان الاطباء البيطريين بيسافروا لدول الخليج او يهاجروا برا

تعرف ان الاعلام دايما بيتجاوز في حقهم ونقيب الاطباء البيطريين مبيفكرش يتكلم ويقول الطبيب البيطري مش كدا

- طيب ممكن الحكومة مش عارفه تعينهم عشان عددهم كبير ؟

شوف ياسيدي انا قولتلك فيه نقص في الاطباء البيطريين غير ان عددهم صغير فمصر فيها 13 كلية طب بيطري تابعة للتعليم العام لكن الطب البشري موجودين في كل جامعات الجمهورية 17 كلية وكمان في الازهر كلية الطب في القاهرة واسيوط ودمياط

كمان دفعة الطب البيطري في كل كلية مبتزدش عن 300 واحد يعني اقل من 4000 طبيب بيطري في السنة الواحدة في حين دفعة الطب البشري في الكلية الواحدة تزيد عن 700 واحد يعني اكتر من 14000 طبيب بشري بزيادة عشر الاف خريج في العام عن الطب البيطري

- بس انا سمعت انهم اتوظفوا في مكافحة انفلونزا الطيور ؟

دول للاسف مش اتوظفوا دول اتبهدلوا .... يعني ياخدوا حوالي 450 جنيه في وظيفة 8 ساعات وبتبقي علي حدود المراكز وبيقف معاه امين شرطة وواحد دبلوم زراعة مع احترامنا للاتنين طبعا

- بس بتهيألي لو عملتوا اضراب مش هتأثروا في البلد ؟

ممكن تتصور مصر بدون كباية لبن يوم واحد او بدون اي منتج حيواني يوم واحد تصور بقي لو معامل تحاليل البيطريين واللي موجودين في المصانع واللي موجودين علي المنافذ بتاعة الجمهورية وحتي اللي بيكشفوا علي الحيوانات وقفوا العمل لمدة يوم واحد

يعني مصر كلها تتعطل يعني قرية البضائع تقف 

يعني شركات الالبان في مصر كلها لا تلاقي لبن يروح لها ولا تلاقي اطباء يوقفوا علي عمليات البسترة ولا تصنيعه في منتجات تانية 

يعني اتخيل كمية الخسارة الاقتصادية اللي ممكن تحصل للدولة وعدد الحيوانات اللي هتفقدها في يوم واحد

- بس كدا حرام عليكم؟

احنا حاولنا بكل الطرق السلمية وقدمنا ورق لرئيس الوزراء ومعملش اي خطوة ايجابية في الموضوع

كتير من زملائنا منعونا من الاضراب قبل كدا عشان ظروف الحكومة والاجواء مع ان كل الناس طالبت بحقها

يعني الاطباء البشريين والصيادلة عملوا اضراب عشان زيادة المرتبات مع ان مسموح لهم فتح عيادات خاصة او صيدليات خاصة ومرتباتهم مرتفعة بالنسبة لباقي المواطنين

مش بيقولوا سواق الميكروباص احسن من الطبيب البشري

انا بقولك ان احنا حالنا أسوأ من التباع

ونقدر نضغط بسهوة عشان حقنا مش هنخسر حاجة

ونقدر خليه يوم حداد علي الطبيب البيطري ويشوفوا الدولة هتخسر كام من غيره لمدة يوم

شاركونــــا علي الايفنت دا

لازم تحضر

جديدة في الفيسبوك ... لازم تاخدي بالك

جديدة في الفيسبوك .... اهلا وسهلا بيكي ..... لكن خدي بالك

الفيس بوك شبكة اجتماعية يعني شبكة للتعارف بين الناس ويعتبر كمجتمع صغير 

لكن الحقيقة هو مجتمع كبير .... كبير جدا جدا

ليه بكلمك كانثي 

لاني عارف الرجالة مبيفرقش معاهم اي حاجة

ولا بيعبروا بيقولوا اي كلام ويعملوا اي حاجة ومحدش بيلومهم او بيلوموهم لوم خفيف

لكن انتي اكيد اللوم هيبقي صعب فليه نعرض نفسنا للاحراج

-----

يلا بينا علي الدرس الاول

الخصوصية privacy

لما تيجي تكتبي علي الحائط بتاع الفيس بوك ولو انتي عامله الخصوصية عامة كل الناس هتشوف اللي بتكتبيه 

طيب انا بحب اسيب صفحتي عامة الكل يشوفها بس فيه حاجات خاصة محبش الا اصحابي بس يشوفوها

وفيه حاجات عاوزة كل الناس يشوفوها الا حد معين

طيب ما تيجي نشوف كدا

لما تيجي تكتبي علي الحائط wall بتكتبي في الفراغ اللي فيه رقم 1

هتلاقي عند رقم 2 قفل صغير ولما تدوسي عليه هتلاقي نزل قايمة منه 

القايمة دي هتلاقي فيها اختيارات للناس اللي عاوزاهم يشوفوا البوست او الكتابة اللي انتي هتكتبيها طبعا سواء كتابة او صور او فيديو ... الخ

لو عاوزة حد معين ميشوفش البوست او الكتابة دي اختاري تخصيص اللي هو اخر اختيار في القائمة الصغيرة customize 

هيطلعلك نافذة صغيرة زي الصورة اللي تحت

القايمة اللي قصادها رقم 1 في الصورة التانية دي الناس اللي هتشوف الصورة ودول بيبقوا اصدقاء الاصدقاء او الاصدقاء بس او كل الناس

الفراغ اللي هو رقم 2 دا بتكتبي فيه اسم المستخدم اللي ممكن يكون من اصدقائك ومش عاوزاه يشوف انتي كاتبه ايه او حاطة صورة ايه

كمان الاختيار رقم 3 لو دوسنا في المربع الصغير هتطلع علامة صح ويبقي الاعدادات دي بقت علطول لكل اللي هتكتبيه بعد كدا الا اذا انتي غيرتيها تاني

- طيب بالنسبة للبوستات اللي انتي حاطاها او حد باعتها عندك ممكن تتعاملي معاهم ازاي

لو شاورتي علي البوست سواء فيديو او صورة او كتابة هتلاقي طلع علامة اكس صغيرة ولو دوستي عليها زي الصورة اللي تحت كدا

هيطلع منها قايمة

 رقم 1 في القايمة في الصورة الاخيرة دي يعني احذف البوست 

رقم 2 دي خاصة لان البوست رابط من علي اليوتيوب ولاني رابط الحسابين مع بعض

رقم 3 دي خاصة باني امنع حسابي بتاع اليوتيوب من انه ينشر علي صفحتي

رقم 4 دي اني ابلغ عن البوست

---- 

انا عارف ان كل الناس عارفة الكلام دا بس اكيد فيه ناس جديدة وممكن متخدش بالها من الموضوع دا ويوقعها في حرج

يلا سلام...........

عزيزي : لا تقرأ هذه التدوينة لانك لن تفهم شيئاً

انا نصحتك متقراش التدوينة 
افتكر كويس اني نصحتك
--------
هقول ايه
حسبي الله ونعم الوكيل
لما الواحد يكون بيتسلي مع بنات تمشي وكله يبقي تمام وزي الفل والواحد يثبت البنت بكلمتين وينفض لها وتلاقيها هي اللي بتجري وراك وبطاردك في كافة المواقع الاجتماعية وبرامج الدردشة لغاية لما تزهق في حياتك من البنات واللي جابوهم
فاكر لما اتعرفت علي بنت مسلمية من بلد اجنبية مسلمة نصها مصري - نص البنت - وقعدت معاها 3 سنين لغاية لما جبت اخري وفي الاخر محستش باقتناع ان العلاقة دي ممكن تنفع بين اتنين ميعرفوش بعض الا من ع النت مع انها فرصة كانت قوية كل اللي عرف بيها حسدني عليها
لكن انا مش مقتنع ومقدرش اضغط علي نفسي في سبيل علاقة حاسس من وجهة نظري ان محكوم عليها بالفشل
اي نعم البنت مثقفة ومتعلمة تعليم عالي وموظفة بين الدول وفلوس وبيوت في مصر والبلد التانية لكني مش مقتنع بان هينجح الموضوع دا والاكيد اني مش نزار قباني ولا احمد شوقي عشان كلامي يعمل معاها فعل السحر كدا
دي علي الاقل مبتلبسش زينا وانا مبحبش كدا مبحبش كدا خالص
كمان النقطة المهة اللي هي الفيصل عملت كل حاجة من ورا الكي بورد ..... اكيد انا مش جان ايجيبت ولا حتي جان بيتنا عشان تزيل الحواجز كلها كدا ....... وشباب النت بياعين كلام اصلا ومعندهمش حرمة لحد
طيب يعني لو اتجوزنا انا وهي هسيب معاها الكمبيوتر في البيت ازاي
دا انا هشك في الماوس مش فيها بس
وانا معنديش استعداد اعيش حياتي في شك
انا عاوز اتجوز واحدة وانا معاها تكون امراة مية وخمسين في المية انما وانا برا البيت تكون راجل 200 ف المية
انا فعلا غلطت اني اتورطت في العلاقة دي لاني انا اللي ابتديت الغلط
ربنا يسامحني
المشكلة انا اللي طلعت خسران ذنوب وتعب نفسي
ملعون ابو النت
بس النت وسيلة وانا استخدمتها غلط
بس عذري كان اني كنت مراهق والحمد لله ان الموضوع متطبقش ع الواقع
والحمد لله عمري ما خدت منها فلوس زي بعض الشباب ما بيعملوا ولما عرضتها قفلت معاها لاني راجل وعيب اني اخد فلوس من ست حتي لو نصب بردوا مش ست
بس الدرس دا علمني كتير وخلاني كويس
سبت الشات الا مع صحابي وبعض البنات المحترمات
ايوا فيه بنات محترمات بس قليل
عيب البنات ان مشاعرهم حساسة وع النت في الشات كل الولاد بيبانوا عباقرة ومثقفين واخلاق
جوجل بقي الله يباركله
فاكر لما عرفت بنت مطلقة من دولة عربية شقيقة ولقيتها محترمة والله استغربت جدا
بس اعجبت بيها جدا جدا واعتبرتها اكتشاف يمكن لاني قليل اما قابلت بنات محترمين ع الشات حظ بقي
ميزة الامريكان ع النت الوسخ وسخ والمحترم محترم وش كدا
مش يلف ويدور
اللي استفدته كمان بعد اما انقطعت عن الشات اني اتجهت لمواقع ليها لازمة وللقراءة ودول احسن كتير استفادة بجد
بصراحة حسيت اني من اوروبا ولا امريكا الشات فرفشة انما معظم وقت النت استفادة
بس يوم ما اجي اختار عروسة واحب اتكلم معاها عشان اعرف دماغها ايه تقفل في وشي
غريبة جدا
ممكن لاني بطلت استعمل اسلوبي القديم
يمكن لاني مقدرش انفضلها واسيبها لغاية لما تيجي بنفسها زي الباقي
انا فعلا فكرت استخدم الاسلوب دا وانا عارف انه بينفع مع البنات علي الاقل 99 ف المية منهم
لكن انا كنت بتكلم علي جواز مش هلس وشات وكلام فاضي
يعني هو انا يوم ما اهلس هعمل كدا مع حد ممكن يعرفني بسهولة
مش منطقي يعني
ممكن تكون مرتبطة وعشان كدا قفلت الباب
نصيب بقي بس كان نفسي الاقي حد زيها واثق انه محترم وتربية كويسة
المشكلة بجد لما تتجوز هتسيب مراتك تقعد ع النت
طيب النت دلوقتي شئ حيوي وخلاص زمن الاستعباد انتهي وانا عن نفسي مش مقتنع بيه
لكن ياتري هتسيبها ع الشات براحتها بقي وفيسبوك وكلام كدا
ولا هتقولها نت بلا فتنة قصدي بلا دردشة
ولا هتبقي واثق فيها ثقة عمياء
خد بالك ان الثقة بتيجي بالتجربة مفيش ثقة عمياء بمجرد ورقة المأذون
هو مش شك مطلق لكن ممكن نقول ثقة حذرة اصلي مش مربيها علي ايدي مثلا
اسوأ حاجة لما تيجي تتكلم مع واحدة ومتعرفش هي ممتنعة ليه ؟؟؟؟؟؟
ممكن يكون خوف او حياء او مرتبطة بحد تاني
بالنسبة للحياء دا بقي البقاء لله فيه
انما الخوف موجود
الارتباط في العصر الذهبي للاتصالات بقي شئ غالب الظن
وبما ان الموضوع هو غالب الظن
فمن الجايز جدا تكون مرتبطة
علي راي تميم البرغوتي
كان نفسي يامصر ابرهن علي كلامي بدم
وانا بقي كان نفسي اعرف مرتبطة ولا لا عشان اخلص من الوش اللي في دماغي
اااااااااه لو كانت بنت عادية بالنسبة لي
والله ولا بلاش من غير حلفان كنت خليتها تتحايل عليا
ايون انا خبرة - مش حق انتي خبرة ياعسل - ايوا انا خبره
لكن للاسف حطيتها في موضوع فوق مستوي البنات العادية
المشكلة الدنيا دي مبتديش محتاج
لو محتاج وحدة حلوة ختلاقي وحشة
ولا مش همك الجمال هتتجوز برنسيسة
ولو عاوز الاحترام هتغلب
ولو مكبر دماغك ممكن تقع في واحدة ماشية ع الصراط المستقيم
عشان كدا انا قررت اني ( مش هيفرق معايا الجمال وهكبر دماغي )
واللي يغيظك ف البنات تقولهم الجواز التقليدي يقولولك مبنحبوش
وساعة لما تحاول تتعرف قبل الجواز تلاقي حيطة سد
حيرتونا وجننتونا معاكم
يعني بالعقل كدا ممكن حد يعرفك تروح تعاكس حد يعرفه ولا تغلس عليه اكيد مفيش حد يعمل كدا الا لو حد متخلف بقي ودا مبيحصلش مع حد بيفهم
اه لو ارجع لايام زمان
لكن انا قطعت عهد علي نفسي وانا لما بقرر حاجة مستحيل اكسرها

التوقيع / واحد مخه ضرب من الشات والجواز
ومتسألش ايه علاقتهم ببعض
لانك لو سالت تبقي مفهمتش حاجة
وافتكر كويس اني حذرتك
please if you understand anything leave me a solution or advise 

قصة حب علي صفحات الفيس بوك

عزيزي ........

بالتأكيد تعرف حسابي هذا فكم من المرات دخلت عليه تتصفحه وتبحث علي حائط حسابي لتعرف احوالي وتعرف صفاتي .. نعم شعرت بك وانت تعبث فيها محاولا استكشاف شخصيتي ..... لا تتخيل كم كنت سعيدة وانا اشعر بك تحاول دخول الصفحات التي اشترك عليها لاجدك تعلق علي ما اكتبه عليها وكم كنت اشعر بالغيرة عند اجد الفتايات معجبين بما تكتبه ويكتبون لك عبارات المجاملة واحيانا عبارات الغزل المغلفة بالاحترام ..... لا تتصور كم كنت اشعر بالغيرة منهم وانا لا استطيع ضغط زر اعجبني علي تعليقاتك لكي لا تشعر باهتمامي بك ومتابعتي لكتابتك ..... كنت اعرف انك تترك الحائط الخاص بك مفتوحا لاري نشاطك وكتاباتك واستطيع تتبعك وكم كانت تروقني ابيات الشعر التي تكتبها علي حائطك وكم كنت اشعر انك توجهها الي بصفة خاصة وكم كنت اضحك فرحاً عندما يسالك اصدقاء عن انك في حب جديد وانت تنكر لهم ذلك .... كم كانت الاغاني الرومانسية التي تضع روابطها علي حائطك تشعرني بالحب والاهتمام وكانك تغنيها لي .... مازالت انكر علي نفسي كيف قسوت عليك حين ارسلت رسالتك البريئة الي متظهراً بانك تسأل عن أحوال المحافظة التي اكمل دراستي بها ايام الثورة وكيف اني رددت عليك بشكل مقتضب لكي لا افتح لك مجالا لحديث طويل ..... مازلت اندم علي تلك اللحظة التي رفعت يدي عن لوحة مفاتيحي الكمبيوتر المحمول لامسك الفارة واغلق الرسالة .... انها لحظة عبرت فيها عن كل غروري متناسية اهتمامك بي .... لحظة اردت ان اثبت لنفسي انني الطرف الاقوي ولست الاضعف فها قد جئت إلي وانا اغلق الباب في وجهك ....كم العن غروري .... غرور افقدني اياك ..... لقد حكيت لصديقتي العزيزة علي كيف انك كتبت تسال عن الثورة واذا حدث اضرار او خروج بلطجية .... لقد اقنعت صديقتي انك ما قلت ذلك الا خوفا عليّ ... ثم اظهرت لها اني فتاة غير سهلة ولم اعيرك اهتمام فقط رددت بكلمات بسيطة واغلقت الموضوع لكي لا امنحه فرصة الاسترسال في الكلام او سؤالي عن احوالي .... ولا استطيع ان اصف لك كم الغرور الذي عشته وانا اصف لها ذلك الموقف وكم الشعور بالفوز عليك وهي تمدحني وتمدح تصرفي ..... اجل فزت عليك وخسرتك ..... فانا الفائزة الخاسرة ..... فائزة بمديح صديقاتي خاسرة حب قد لا استطيع ان اعوضه ..... لا اعلم كيف تحبني وانت لم تراني الا مرات قليلة قد لا تعد علي اصابع اليد الواحدة .... لكنه الحب يفعل الاعاجيب ...... لا انكر ان صديقاتي اعجبهن تصرفي في ذلك الموقف .... الا تلك الصديقة التي طالما عارضتني ...... اعلم انها تغير مني لاني افضل منها في كل شئ .... الملبس والعائلة والمستوي المادي ... وحتي في الدراسة والتحصيل فانا اكثر منها ذكاء ..... لا اعتقد انها تمتلك حساب علي الفيسبوك وبالتأكيد لا تمتلك حساب علي تويتر ... اعتقد انها لا تعرف الانترنت ولا تستطيع الدخول الي عالمه الواسع ..... اعجبني جدا حين كتبت علي حائطك عنوان حسابك علي تويتر .... اعرف انك كتبته من اجلي لكي اتبعك علي تويتر .... لكني رفضت ان افعل ذلك .... لقد دخلت وتصفحته فقط ...... اذكر يوم نصحتني صديقتي بان اغير اعدادت حائطي علي الفيسبوك لكي لا ترى ما اكتبه كنوع من الدلال واذكر يومها كيف اعجبتني الفكرة وكنت انتظر رد فعلك كيف سيكون ...... واعجبني يومها ابيات الشعر التي تعاتب من هجرك يوم وضعتها علي حائطك وعلمت انك تعاتبني بها .... كم كانت عذبة تلك الابيات .... ولكني اصررت الا اظهر الحائط كنوع من زيادة الدلال عليك ..... اعلم  انك تحبني بصدق علي الرغم من انه لم يجري بيني وبينك اي حديث .... فالحب جنون كما يقولون ... وانا واثقة انك مجنون بي ...... ولكن فاجئني يوم ان وضعت صورة دبلتين علي حائطك علي الفيسبوك لتدعو زملائك الي حفل خطبتك ..... كيف هذا ؟ انا متأكدة انك لم ولن تخطب غيري فانت تحبني ..... متأكدة يوم جعلت صديقتي تغير بيانات حسابها علي الفيسبوك وتكتب النوع ذكر لكي اري رد فعلك واذكر يومها كيف كانت حزينة ابيات الشعر اللي تضعها ..... واثقة من انك تحبني من مطارداتك لي علي كل الصفحات التي اشترك بيها وكيف الغيت اشتراكتي فيها كنوع من مداعبتك ....... انا واثقة من ان موضوع الخطوبة هذا لم تفعله الا لتحيرني ... ولكني واثقة في حبك لي ...... انا كتبت هذه الرسالة اليك لاني مللت الهروب منك واحب ان ارتاح مع شخص يحبني مثلك..... يمكنك ان تتقدم لطلب يدي وانا ساوافق فورا

مع خالص مودتي

------------

عزيزتي الاخت ........

السلام عليكم 

مع خالص تقديري لشخصك الكريم لكني لا اعرف من انتي

نصيحتي لكي في الله ان تتقدم لطبيب نفسي - وذلك ليس عيبا - وتطلبي منه الكشف عليك لتحديد السبب في تلك الاعراض ولكن اظن من قرائاتي المتواضعة انه نوع من الفصام وعليكي معالجته فورا لكي لا تتحول لازدواج في الشخصية - لا قدر الله

واعلمي اني لن اتزوج فتاة لديها فيسبوك او علاقات بالانترنت

اتمني ان استطيع دعوتك لحفل الخطوبة ولكن خطيبتي لا تحب حضور شخص غريب

شفاكي الله وعافاكي

ملحوظة : الرجاء عدم ارسال رسائل اخري 

=============

دا كان نموذج رسالتين بين مهووسة فيسبوك وشخص عاقل

طبعا القصة من وحي الخيال وان كنت اعتقد ان الامرر تكرر وسيتكرر وان اختلفت الصورة قليلا

طبعا قد يكون الرجل بموقف الفتاة والعكس وهذا ليس له دخل باصل القصة

اتمني ان تكونوا استمتعم بالقصة

مهزلة الجاسوس الاسرائيلي

إيلان تشايم جرابيل : مواطن اسرئيلي-أمريكي دخل مصر ثالث ايام الثورة 28-1-2011
تم القبض عليه يوم 12-6-2011 بتهمة التجسس علي مصر
مواصفات الجاسوس:
الجنسية : مزدوج ( امريكي - اسرائيلي )
الديانة : يهودي ( ومتقوليش طبعا يهودي لان نص الجواسيس اللي بيجوا مصر مبيبئوش يهود )
العمر : 27 عام ( حسب الجرايد )


المهمة : تجنيد الشباب المصري - العمل علي فتنة طائفية - العمل علي الوقيعة بين الجيش والشعب - التصوير في الاماكن الحساسة ( طبعا في الازهر وقدام التماثيل وفي ميدان التحرير )

دي غالبية المعلومات او الخلاصة
-------------
طيب محدش فيكم عمره شاف جاسوس فيس تو فيس كدا؟
ولا انا بردوا
لكن اللي اعرفه لما تكون المخابرات متابعة واحد جاسوس او جروب جواسيس بتحاول تشوف اهدافهم وتجهضها وتبين لهم في نفس الوقت انهم نجحوا
طيب ياتري دا حصل ؟ ( خصوصا انهم سابوه حوالي 5 شهور يبرطع في مصر )
يعني الفتنة الطائفية والوقيعة بين الجيش والشعب وتجنيد الشباب ( الله اعلم اكيد جند شباب ....... وشابات )

او ناس في متوسط العمر

او ناس في اخر العمر ( ربنا يديك الصحة ياعم الحج )

طيب بالنسبة للجاسوس مش كتير عليه يعني شغلانة كتيرة علي شخص واحد يعني لو بيشتغل فل تايم مش هيقدر يخلص مهمته والله ما هيكفي ( ياتري بياخد كام )
يقولك انه دخل الازهر وخطب في الناس عشان يعمل وقيعة ( خطبة الوقيعة ودي تتقال ازاي ) .... طبعا هو بيعرف عربي بلهجة شامية ... هل تعتقد ان واحد بيتكلم شامي ممكن يطلع يخطب في الازهر ويوقع بين الناس
 ومفيش حد يقوله اسمك ايه

طيب هما قالوا انه دخل الازهر بحجة انه عاوز يسلم .... يعني اللي عاوز يدخل الاسلام في مصر نطلعه يخطب عدل اذا كان احنا مسلمين من زمان ومنعرفش نقول حاجة عن الاسلام
طيب الصورة

الصورة عادي جدا واحد شامي عاوز يتصور
طيب لو كان حقيقي كلامهم انه كان بيخطب 
يبقي نقفل الازهر لو كان يجي حد من اي دولة ويقول اللي هو عاوزه كدا
طيب يعني اللي اسمعه عن الجواسيس انهم بيتحلوا بالسرية مش مفضوحين وعاملين فيك بوس باسمهم وحاطين عليه المعلومات والصور بتاعتهم
دا كان ناقص يعمل ايفنت التجسس علي مصر ويعمل انفيتيشن لاصحابه
طيب هو كونه نزل التحرير يبقي جاسوس ؟

مش شرط .... لان برنارد ليفي ( بيقولوا مرشح لرئاسة اسرائيل ) نزل التحرير واتصور مع الدبابة والعساكر كمان

طيب بيقولوا خدم في جيش اسرائيل؟
طيب معظم المصريين خدموا في الجيش المصري معني كدا انهم جواسيس في دول العالم وبيتصوروا هناك وممكن ينزلوا مظاهرات كمان ثم اسرائيل التجنيد اجباري
طيب بالنسبة للصور اللي متصورها؟

يعني جاسوس هيتصور في الاتوبيس ليه عاوز يقيم حالة النقل العام ولا اسرائيل ناوية تشتري اتوبيسات زي اللي في مصر
ثم ايه الصور اللي متصورها دي كلها؟
انا شوفتله ما يقرب من 20 صورة وفيديو ودي جوا مصر لدرجة ان صوره اللي جوا مصر اكتر من صوره في اسرائيل
هل ياتري منطقيا يقدر ينفذ مهمته لوحده؟
يعني فتنة بين الجيش والشعب والمسلمين والمسيحيين .... اكيد سوبر مان او سوبر جاسوس مع انه باين عليه عنده انيميا حادة
طيب هارش دماغك ليه ما يولع؟
يولع ياسيدي ....... بس انا خايف يبقي زي حادثة المنشية بتاعة عبدالناصر
ويطلع واحد يقولك الجاسوس قال علي ليستة الناس اللي جندها ولموا بقي البشر اللي لسانهم طويل


من رأيي الموضوع غير مقنع هو فيه جاسوس لبلد هيشيل جوازها في جيبه وفي نفس الوقت يتصور زي الاهبل مع كل حد يقابله الا اذا كان عاوز يترشح في جواسيس جوت تالنت
انتوا تعرفوا ان عندنا اسرائيليين كتير بيدخلوا مصر سواء طابا او شرم الشيخ او دهب او القاهرة وخصوصا ان احتفال مولد ابو حصيرة كان قريب
انتوا تعرفوا ان دخول الجيش الاسرائيلي اجباري
طيب ليه طالعين بالجاسوس دا السما ونفضوا عن حكاية جاسوس ايران
ليه الجاسوس اللي بيلم معلومات اتقبض عليه في لحظات ودخل السجن 
وفي نفس الوقت الجاسوس اللي اكبر منه برتبة رئيس دولة قتل وسرق ونهب ومشي مصالح اسرائيل وظبط اقتصادهم وضرب تعليمنا وجيشنا وشرطتنا وقاعد في الشرم
ليه ميروحش مارينا ...... ايوا مارينا بتاعة الاغنيا
وياريتني جبت المايوه معايا

 

انا مش فاهم .......... واللي فاهم يفهمني
وبقول اذا كانت اسرائيل بهذا الغباء فهيا نحتلها غدا

مسيرة الاطباء البيطريين من امام النقابة وحتي مقر مجلس الوزراء

يوم 14-6 الموافق الثلاثاء مسيرة للاطباء البيطريين من امام النقابة بشارع القصر العيني وحتي مجلس الوزراء

دعوة الى كل طبيب بيطرى شريف يغار على وطنه قبل مهنته الضائعة لمسيرة حاشدة للأطباء البيطريين من النقابة العامة الى مجلس الوزراء يوم الثلاثاء القادم بالتزامن مع وقفة احتجاجية فى كل محافظات مصر أمام مبنى كل محافظة ليعلم المجتمع بأسره مدى اهدار كرامة وحقوق الأطباء البيطريين فى مصر ... ليست فئوية نريد أدنى حقوقنا التى أهدرها النظام الفاسد فى مصر وهى .... 1-كيان مستقل للأطباء البيطريين يتبع رئاسة الوزراء مباشرة 2-اعادة تكليف الخريجيين وبأثر رجعى اسوة بباقى المجال الطبى 3- تثبيت المؤقتين لسد العجز فى الكوادر اللازمة لحماية صحة الانسان والحيوان 4- المساواة مع باقى المهن الطبية فى الكادر المالى والادارى والفنى 5-حل مجلس النقابة الذى سقطت شرعيته بعد ثورة مصر المباركة واجراء انتخابات عاجل

لماذا لا تفكر مصر في الانضمام لمجلس التعاون الخليجي ؟

 سؤال في غاية الاهمية........

فلماذا لما تفكر مصر في الانضمام لدول مجلس التعاون الخليجي ؟
في حين طلبت الأردن والمغرب الانضمام وتمت الموافقة علي طلبهم
هذا السؤال يجعلنا نتطرق الي سؤال اخر
ماذا تستفيد مصر من الانضمام الي دول مجلس التعاون الخليجي ؟
- تصدير السلع لدول مجلس التعاون دون قيود جمركية ومعاملتها معاملة المنتج الوطني ( دول الخليج في اي عقود تشغيل او ما شابه تفرض استخدام المنتج الوطني ان وجد ) = سوق مفتوح بدون جمارك
- قانون جمارك موحد مع حماية الصناعات الوطنية ومكافحة الاغراق
- مخلصين الجمارك المصريين - لو مصر انضمت - يمكن ان يعملوا في داخل دول مجلس التعاون
- المساواة بين مواطني دول مجلس التعاون حتي في شراء الاسهم
- مرور مواطني دول مجلس التعاون بدون تأشيرة بين دولهم ( في حالة العضوية الكاملة ولم يتحدد نوع عضوية الاردن والمغرب سواء كانت كاملة ام لا مع العلم ان جميع دول مجلس التعاون الست تتمتع بهذه الميزة )

ما الضرر الواقع علي مصر من الانضمام ؟
- التعاون العسكري المشترك
- الانضمام لقوات درع الجزيرة
- ربط مراكز عمليات القوات الجوية والدفاع الجوي للدول الاعضاء
- التدريب المشترك بين الدول الاعضاء
- تحديد او قطع العلاقات مع ايران
لكن كل ما سبق يحدث فعلا ولو بدون اتفاقات لان امن دول الخليج ولو ليست من مجلس التعاون هي امن قومي لمصر وبالنسبة للتدريب المشترك فيحدث بالفعل في مناورات النجم الساطع ( اكبر مناورات متعددة الجنسيات في العالم بواقع 33 دولة وبمشاركة 43 الف جندي مصري ) يعني الموضوع حصل بالفعل اما بالنسبة للعلاقات مع ايران - وان كنت اشجعها - الا انني اجد ان العلاقات مع دول الخليج تغني عن ايران 


ما الضرر علي دول مجلس التعاون اذا انضمت مصر؟
- زيادة العمالة الماهرة بدول مجلس التعاون الخليجي مما يؤثر علي المواطنين المحليين وزيادة البطالة ودي ممكن تتحل بتشريعات خاصة ان اعتماد دول الخليج علي العمالة الاجنبية ويمكن استبدالها بمواطنين دول مجلس التعاون
- فتح الحدود بين دول مجلس التعاون ودي ممكن بعمل اعداد للدخول حسب طاقة كل دولة من دول مجلس التعاون


ماذا تستفيد دول مجلس التعاون اذا انضمت مصر ؟
- عمالة ماهرة
- منتجات بسعر ارخص وخاصة المنتجات الطبية
- فتح استثمارات زراعية 
- دعم عسكري


لكن هل يستحق الأمر المحاولة؟
- في نظري يستحق المحاولة


هل يدعم الشعب المصري والشعوب الخليجية ذلك الانضمام؟
- اتوقع ذلك


المصادر :
http://www.gcc-sg.org/
http://www.bbc.co.uk/arabic/middleeast/2011/05/110510_gulf_morocco_jordan.shtml
http://www.spa.gov.sa/details.php?id=485430

إشاعة : لا تشرب البيبسي الجديد و ميرندا تفاح الجديد و ديو الجديد

تحذير؛؛؛؛!!!!!!

لا تشرب البيبسي الجديد!
وميرندا تفاح الجديد!
والديو الجديد!
لانه يحتوي على ماده مسرطنه (E211-E224)
ودهون من خنزير لاتحذفه بل انشره الى جميع المسلمين...منقول من قناه الجزيرة

-----

اشاعة ظريفة او خلينا نقول خبر ظريف لازم يمر علينا كل كام سنة عشان يحلي الجو كدا وتقريبا بيحبوا يظبطوه في الصيف المهم انه ممكن يكون معمول بحسن نية مع المقاطعة - وانا مع المقاطعة - او محطوط بسوء نية - من شركة منافسة مثلا - لاحظوا ان الفيس بوك ساعد في سقوط رؤساء دول فيعني بتهيألي بيبسي مش احسن منهم

المهم وكما تعودنا احقاقاً للحق ولكي لا نكذب علي انفسنا وعشان منضحكش علينا الاجانب لازم نعرف الحقيقة ومنمشيش ورا اي كلام من اي مصدر

----

وكما تعودنا سويا سنبحر مع جوجل - خايف ليجي يوم ويقولوا جوجل فيه دهن خنزير - ونكتب الرقم الكودي للمادة E211 , E224

مادة الـ E211  هي بنزوات الصوديوم = مادة حافظة ويتم انتاجه بمعادلة حمض البنزويك بهيدروكسيد الصوديوم

المصدر:

http://en.wikipedia.org/wiki/Sodium_benzoate

مادة الـ E224  هي بوتاسيم ميتاسالفيت مادة كيميائية حافظة تمنع نمو اقوي الميكروبات وهي عبارة عن حبيبات بيضاء او بودرة وتستخدم كمادة مضادة للميكروبات وكمصدر لحمض الكبريتيك ( مية النار )

المصدر:

http://en.wikipedia.org/wiki/Potassium_metabisulfite

---

الكمية المسموح تناولها من E211

5 مليجرام / كجم من وزن الجسم يوميا ( يعني لو واحد وزنه 50 كجم يمكنه تناول 250 مليجرام = ربع جرام في اليوم )

المصدر :

http://www.food-info.net/uk/e/e211.htm

الكمية المسموح تناولها من E224

0.7 مليجرام / كجم من وزن الجسم يوميا ( يعني لو واحد وزنه 50 كجم يمكنه تناول 35 مليجرام في اليوم )

المصدر :  

http://www.food-info.net/uk/e/e224.htm

--- ملحوظة صغيرة

الاشاعة دي اتعملت في بلاد برا من زمان ولاننا " أفلام عربي أم الأجنبي " رفضناها وعملنا الاشاعة بتاعتنا

ودا كان الرد عليها في موقع التحقق من الاشاعات hoaxcheck

http://hoaxcheck.religeo.com/content/news/News_Item.asp?content_ID=18

وهذا موقع للتأكد من الاطعمة الحلال

http://www.guidedways.com/halalfoodguide.php

المادة E211 والمادة E224 هي مواد حافظة موجودة في معظم المعلبات ولا تقتصر علي البيبسي والديو والفانتا

نفسي افهم ليه بيلبسوها ف الجزيرة

ملحوظة هامة جداً:

المواد المذكورة بعاليه مواد معتمدة في جميع المنظمات الدولية ولا يعني هذا سلامتها التامة فلقد اظهرت بعض الابحاث الجديدة في المختبر انها تؤثر علي الحمض النووي الموجود في الميتوكوندريا - مصنع الطاقة - بالخلية والذي يحول الاكسجين بداخل الخلية الي طاقة مما قد يؤدي في حال زيادة تلك الكميات من المواد الحافظة في الاطفال علي ظهور اعراض مرضية ولكن لم يتم اعتماد تلك الابحاث حتي الان لتطبق علي النطاق الاستهلاكي ويؤكد الباحثون علي ان الابحاث السابقة التي تمت منذ خمسين عاما علي تلك المواد الحافظة ليست كافية لتثبت صلاحيتها ولابد من اعادة النظر فيها 

المصدر :

http://www.independent.co.uk/life-style/health-and-families/health-news/caution-some-soft-drinks-may-seriously-harm-your-health-450593.html