ضيع وقتك في غربتك

عزيزي المغترب بره بلدك

لما كنت طالع من بلدك قرفان من الاوضاع ووصلت بالسلامة الي بلد الغربة وبدأت تستلم مرتبك -ولله الحمد- ولكن وقت فراغك كبير ومش عارف تملاه باي حاجة مش مفيدة ازاي، فانا هنا هحاول امد حضرتك بافضل الطرق الغير مفيدة لتضييع وقت الفراغ ويحضرني في هذا الموقف صورة سكرتير محمود عبدالعزيز في فيلم سوق المتعة وهو بيقوله لو حبيت تصلي افرشلك السجادة واصلي وراك واذا حبيت تسكر اجيبلك احسن خمره واشرب في صحتك فتعاله بينا :
1- الشلة :
مش عشان انته في الغربة فلازم تعيش وحيد حاول تعمل شلة من الناس اللي لهم نفس اهتمامتك من تضييع الوقت وتكبير الدماغ والتنفيض وتقضية وقت الفراغ وهتلاقي النوع ده في مواطني البلد اللي انته بتشتغل فيه وفي مواطني بلدك والبلاد الاخري من المغتربين امثالك.
حاول تجمع شلة بس ياريت محدش فيهم يكون بيشرب مسكرات او مخدرات -مش عشان حرام وبس لكن عشان مش يتمسك ويوديكوا في داهية - طبعا غير السمعة السيئة اللي هتطلع علي شلتكم.
والشلة دي هتساعدك انك تتعرف علي اماكن مرحتهاش في بلدك او بلادك غيرك طبقا للعناصر المتكون منها الشلة.
طبعا الشلة هتفيدك بكم رهيب من الحواديت والمواقف اللي حصلت لهم في بلادهم قبل ما يسافروا او بعد السفر او اللي حصلت في بلاد الغربة قبل واثناء ما كنت موجود
اي نعم هتلاقي ان الحكايات بتتكرر وغالبا هتلاقي مواقف بتتحكيلك وانته اصلا كنت حاضرها بس عادي انته هتتعود وانته نفسك هتلاقي بتحكي حكايات حصلتلك اكتر من مرة ولنفس الاشخاص
كمان ممكن تطور موضوع الشلة دي انك تعمل خوازيق في الشغل لزمايلك خصوصا لو كان المكون الاساسي للشلة زميلك فتتفقوا مع بعض وتعملوا خوازيق للي مش معاكم

2- الالعاب :
أ- الكورة: هي اي نعم مفيدة للجسم كرياضة - وعارف اننا اتفقنا ان الطرق دي هتكون مش مفيدة بس هعوضك اصبر عليا- وبعد اللعب تطلعوا علي مطعم بروت او مندي او مظبي او كبسة او مضغوط وتدوها العشا التمام عشان غالبا اللعب هيكون بالليل
ب- الورق ( الكوتشينة) : وطبعا دي معروفة بس حاولوا متلعبوش علي فلوس عشان متزعلش لما تخسر وممكن حد يبلغ عنكم.
ج- الدومينو : ودي بردوا لعبة لها زباينها وهتحسسك بجو قهاوي مصر الجميلة بس اوعي الحنين ياخدك وتقدم استقالة عشان ترجع لها.
د- الالعاب الالكترونية ( بلاي ستيشن/اكس بوكس ) : بخلاف ان الالعاب دي هتفكرك ايام ما كنت بتهرب من الدرس وتسرح علي الانترنت كافيه فهي مفيدة لتحسين ردود الفعل العصبية بتاعتك - في شائعات مغرضة انها بتقول ممكن تتسبب في الصرع- بس عادي انته بكتيرك هتلاقيك بتشد رجلك فجأة بالليل وانته نايم ودا مش صرع دي بوادره بس.

3- العربية: طبعا لو انته في دولة سعر البنزين فيها رخيص او معاك عربية الشغل فعليك باللف بالعربية وممكن تاخد معاك واحد صحبك او حتي سي دي اغاني شعبية وتقعد تلف طول الليل وتتفرج علي معالم البلد اللي انته فيها 
كمان ممكن تطور الموضوع ده بالتفحيط بالعربية بس خد بالك من الشرطة وحاول تفحط في حته بعيد واوعي تفحط بعربيتك الخاصة عشان مبيوظش فيها حاجة لا قدر الله

4- الانترنت: طبعا الانترنت مش عاوز حد يعرفك عليه واكيد انته نايم من الفيس لتويتر لماي سبيس - عارف انه قديم - بس حاول تطور ادائك عن كده
يعني افتح صفحة ع الفيس يفضل طبعا تكون عن مطرب عشان تلاقي معجبات وترزق وتدعيلي ولو عاوز تصرف شوية افتحلك منتدي وممكن مع الوقت تلاقيلك ترتيب عالمي.

5- المشاهدة: طبعا التلفزيون تشتريلك شاشة متقلش عن 32 بوصة وتشتريلك - لا مش ريسيفر- جهاز عرض افلام ودا فيه منه انواع كتير وبيشتغلك بهارد ديسك وحمل -لا مش افلام- حمل مسلسلات عربي واجنبي كل اللي انته مشفتوش في حياتك هاته واتفرج عليه
ونصيحة ابعد عن الوثائقيات اصلها مملة


لو الكلام اللي فوق مش عجبك ممكن تشوف المقال التاني
http://bossat-eree7.blogspot.com/2015/02/blog-post.html

لو حابب تضيف عليه سيب تعليق باللي انته شايفه

استفيد من غربتك

عزيزي المغترب بره بلدك (خصوصاً المصريين)
انا اعلم جيداً انك ما تركت بلدك الا طموحاً في الوضع الافضل لنفسك ولاهلك ولاولادك من بعدك. لن اطيل عليك الحديث في عبارات كثيرة
لكن وصلك الي هذا المقال غالباً اما انه غباء من جوجل او انك عاوز حاجة مفيدة تقضي بيها وقت غربتك الكتير جداً لانك بردوا غالباً اما مش عارف تلاقي دوام تاني عشان في منطقة تعبانة مش فيها شغل تاني او ان عملك لا يجيز لك ذلك او انك مكتفي بالمرتب الكويس اللي بتقبضه - اللهم لا حسد- المهم ولما كان السبب ان وقت فراغك كبير فتعاله نستفيد منه :
1- القراءة:
عارف ان كتير من الناس مبيحبوش القراءة ومسكة الكتاب عشان بيفكرهم بايام الذل بتاعة التعليم اللي غالبا مشتغلوش بيه وبيشتغلوا في شغلانة تانية او بيشتغلوا في نفس الشغلانة لكن اللي اتعلموه متأخر بسنيين ضوئية عن اللي موجود في الواقع
طبعا مش لازم تشتري كتب ورقية في ظل التطور بتاع اليومين دول وكونك بتقرأ المقالة دي دليل انك عارف القراءة الالكترونية من تحميل الكتب الالكترونية وقرائتها علي وسيط الكتروني 
يعني كتب pdf و djvu و txt و docx وخلافه عبر البرامج الخاصة بها
كمان ممكن تقرأ علي موبايلك سواء سامسونج او نوكيا او ايفون او اي نوع
او تقرأ علي اللاب توب
او تقرأ علي الايباد
ملحوظة رفيعة كده: لو بتحب تقرأ عن السياسة حاول متتكلمش عن اللي بتقرأه خصوصا لو كنت متغرب في الدول العربية عشان متدعيش عليا.

2- الاستماع :
بما انك في الغربة فاكيد انته بتستمع بس اما للاغاني بتاعة بلدك او بالكتير لاذاعة بلدك 
طيب انته ممكن تستمع لحاجات كتير اوي واحد هيقولي تستمع للقران طبعا القران اساسي وباذن الله تستمع له وممكن كمان تستمع للكتب الصوتية
الكتب الصوتية دي حاجة جميلة خالص ممكن بدال ما تقعد تقرأ كتاب وتمقق - او تمأأ عشان مش عارف تتكتب ازاي- عينيك تسمع الكتب المتاحة عشان طبعا مش كل الكتب متاحة صوتيا
كمان ممكن حتي تستمع لبعض المقالات اللي بتتنشر في الجرايد
ودا ممكن اما عن طريق تحمل الكتاب من علي اليوتيوب وتحوله mp3 وتحطه علي الفلاشة بدال اوكا واورتيجا او معاهم وتسمع وانته سايق او ع الموبيل او الايباد وتسمع وانته راكب او ع اللاب توب وتسمع وانته بتتصفح النت بعد اما تكون خلصت دردشة مع اهلك في مصر
ممكن كمان تحمل الكتاب mp3 مباشرة من بعض المواقع
كمان فيه برنامج اسمه "اقرألي" للموبيل كل الانواع وفيه محتوي معقول
http://menassah.com/iqraaly
ممكن كمان تشترك في بودكاست للكتب الصوتية

3- اقرأ وسجل:
دا اذا كنت بقي عاوز تكسب ثواب في نفسك وفينا وفي العالم العربي كله
ودا بانك تشتري ميكرفون او حتي تسجل عن طريق اللاب توب او الايباد او الموبيل من غير ميكرفون وانته بتقرأ كتاب وصدقني فيه ناس كتير هتعجب بصوتك مهما كان رفيع او تخين وهيدعولك ومش هقولك كل حرف بحسنة او بكام بس الاكيد ربنا عمره ما هيضيع تعبك
كمان مش لازم تعمل مؤثرات صوتية زي اللي بيسجلها محترفين او تقارن تسجيلك بتسجيلات شركات عملتها لانهم بيبقوا مكلفين عليها الشئ الفلاني.
طبعا انته مش هتعرف تسجل الكتاب مرة واحدة لكن اعمله حلقات علي قد وقتك وممكن ترفعه علي موقع يوتيوب او موقع اقرألي.

4- ترجم :
طبعا الموضوع دا لاخوانا من حاملي اللغات الاجنبية ودا علي طريقتين
أ- ترجمة كتاب: ودا انك تجيب كتاب انته حاسس ان له لازمة في مجالك او اي مجال تاني يعني كتاب له قيمة مش لازم يكون الف صفحة يارب يكون كتاب عشر صفح المهم ان هيثري المحتوي العربي وتترجمه وحطه علي منتديات الكتب وناس كتير هتستفاد
ملحوظة رفيعة: لو حضرتك مترجم كتاب حلو ممكن تخاطب الناشر للكتاب الاصلي وتحاول تستئاذنه في الترجمة العربية للكتاب وممكن نحلم ونقول انك تلاقي ناشر عربي يطبعه . بس علي افتراض انه ده عمل بتدور تكسب ثواب في الجيل الجاي فساعتها مش مهم المكسب المادي لكن اذا اجتمع الاتنين فاكيد محدش هيقول للخير لا
ب- ترجمة مقال: ودا ممكن عبر موقع ويكيبيديا انك تترجم المقالات باللغة اللي تعرفها ومش موجودة بالعربي ودي في نظري هيبقي انتشارها اكبر ويكفي انك تعرف ان فيه مقالات علي ويكيبيديا بتتكلم عن شخصيات واحداث هامة في تاريخ البشر وحتي عن اشياء علمية ولا يوجد مقال مقابل لها باللغة العربية ( شوفت المصيبة ).

5- اتعلم لغة جديدة: ودا اما الكترونيا او عن طريق المراكز المتخصصة لتعليم اللغات الاجنبية.

6- العب رياضة : ممكن تحاول التغلب علي كميات الاكل اللي بتاكلها عن طريق رياضة محترمة حتي لو مكنتش بتلعبها في بلدك.

7- اعمل كتاب الكتروني : والموضوع ده هيكلفك شوية انك تجيب اسكانر وشوف كتاب ممكن في مجالك او في مجال بتحبه ويكون مش موجود ع النت ، وحوله لـ Pdf او اي صيغة الكترونية ، طبعا لو معاك موبيل محترم ممكن عمل الموضوع ده من غير تكاليف وبكاميرة الموبيل ، حاول بقي تختار كتاب ملهوش حقوق نشر او يكون قديم محدش هيطالب بحقوق نشر له

لو الكلام اللي فوق مش عجبك ممكن تشوف المقال التاني

http://bossat-eree7.blogspot.com/2015/02/blog-post_14.html

لو حابب تضيف عليه سيب تعليق باللي انته شايفه

ترجمة دستور الغذاء الامريكي (قريباً)

بسم الله

انا هبدأ ترجمة دستور الغذاء الامريكي عشان لو حد عاوز يتعب نفسه يشوف حاجة تانية يترجمها والناس تستفاد باكتر من حاجة بدل ما نترجم كتاب واحد بترجمتين
رابط الكتاب : http://www.fda.gov/Food/GuidanceRegulation/RetailFoodProtection/FoodCode/UCM2019396.htm
دعواتكم
توكلت علي الله

( تحديث ) عمل حساب في بنك مصري للمصريين المغتربين في السعودية

كيفية فتح حساب في بنك يعمل في مصر للمواطنين المصريين الذين يعملون بالمملكة العربية السعودية :
-----------------------------------------------------------------------------------
الكثير من مواطني جمهورية مصر العربية يعملون بالخارج ويزعم البعض ان نسبة المواطنين 10% من عدد السكان في مصر بما يقارب من حوالي اكثر من 9 مليون مصري يعمل منهم اكثر من 2 مليون مواطن بالمملكة العربية السعودية.
قد تفاجأ عزيزي الفاضل انك اذا اردت فتح حساب في بنك مصري مثل البنك الاهلي المصري، بنك مصر، بنك كريدي اجريكول، بنك الاهلي سوسيتيه جنزال nsgb، بنك hsbc فلن يمكنك فتحها من داخل المملكة العربية السعودية.
ولكن احب افرحك اخي العزيزي ان هناك طريقة.
انتظر، انها ليست تلك الطريقة التي ستجدها في اغلب نتائج البحث على موقع جوجل العزيز. (علي جميع المنتديات الا منتدي صغير يتحدث عن الاوعية الادخارية ويضمن الحل عفواً وسط الكلام)
- انها ليست ان ترسل بريد الي احد مديري فروع بنك مصر او بنك فيصل الاسلامي ( لن تجد اي رد عليك الا من مدير بنك فيصل الاسلامي الذي سيحل لك الموضوع .. سانقل لك الحل لاحقأً .. علي سبيل التشويق يعني :) )
- وليست ايضا ان تحضر الي احد ممثلي البنك الاهلي المصري او مندوبي بنك مصر في المملكة العربية السعودية المتواجدين ببعض افرع البنوك السعودية. ( فبعد اتصال مع ممثلي البنك الاهلي بالمملكة اكتشفنا انهم لا يقومون بفتح حسابات ولكن فقط بمتابعة مشاكل الحوالات وقال احدهم ان المملكة منعتهم من فتح حسابات بالمملكة http://www.nbe.com.eg/Default.aspx?AID=7&CID=8)
- بالتأكيد البنوك التي تعمل هنا في السعودية ولها افرع في مصر هي بنوك عالمية ولكن لا يمكنك ادارة حسابك من الافرع المصرية (عن الادارة الكاملة اتحدث من سحب وتحويل وكشوف حسابات )
* طيب الحل ايه ( ترارارااااااااا ) :
الحل الوحيد هنا هو مكتب علاقات بنك فيصل الاسلامي المتواجد بعمارة الملكة بجدة الدور الثامن عشر تليفون رقم 02-6448490
* موظف محترم يستقبل المكالمات 
* المطلوب: - بطاقة الرقم القومي/أو جواز السفر  - مبلغ 500 دولار او اكثر -مشوار الي جدة لفتح الحساب
* يقول الموظف بانه يتم فتح الحساب في نفس الوقت ولكن لايمكنك استلام بطاقة سحب الاموال من الماكينة الالكترونية (بطاقة الصراف الالي) ATM او بطاقة الائتمان
* على حد قول الموظف يمكنك تعبئة طلب تفعيل الخدمة الالكترونية لمطالعة حسابك ، والحقيقة لا ادري مدي خدمات بنك فيصل الاسلامي الالكترونية وان كانت تبدو انها غير مبشرة بالمرة حيث اننا وجدنا الموقع لا يفتح لمدة يومين وسمعت انه لا يتوافق مع بعض برامج التصفح فتجد بعض الروابط لا تعمل
* صديقي قام بمخاطبة مدير احد افرع بنك فيصل الاسلامي وهو الذي اوضح انه يمكن فتح الحساب ورد المدير في وقت قصير واعاد صديقي طلب وسائل الاتصال وعنوان المكتب في السعودية وتمت اجابته وفي وقت قصير

(تحديث) لما رحت لمكتب الامير محمد بن فيصل بن عبدالعزيز ال سعود في الدور ال 18:
* استخدمنا خرائط جوجل والتنقل عشان نوصل google maps + navigation موجودة علي جوالات الاندرويد وع الايفون  (https://goo.gl/maps/m6tyZhUM2m52)  .. ابحث بكلمة ( عمارة الملكة ) عموما هي في مدخل جدة من ناحية مكة عند ميناء جدة الاسلامي والجي بي اس هيوصلك لغاية الباب.
* متنستناش توصل لغاية العمارة عشان مفيش مواقف تابعة ليها او قدامها مباشرة لكن فيه فندق البحر الاحمر قدامه مواقف قليلة بس هتلاقي مكان ان شاء الله او لما الموبيل يقولك باقي 500 متر اركن في اول موقف واتمشي لغايتها.
* اركب الاسانسير (المصعد/اللفت) لغاية الدور ال 18 
* لو لقيت باب المكتب مقفول خبط وافتح عادي متخفش.
* مصريين محترمين جداً
* طلبنا فتح حساب وافونا بالاوراق طبعا لابد من بطاقة الرقم القومي الاصل او جواز السفر الاصل وهيسالك عاوز في اي فرع
* تحتاج عنوان في مصر او صندوق بريد في السعودية عشان كل اربع شهور هيجيلك تقرير الحساب علي العنوان ممكن تعمل حاجة اسمها حفظ مراسلات تمنع البريد البنكي لكن بيكلفك فلوس ولازم تروح البنك مرة واحدة في السنة علي الاقل.
* لازم تكون بتعرف توقع ايوا توقع يعني تمضي ومش فورمة لا تكتب اسمك ثنائي او ثلاثي يعني مثلا (محمد احمد) "تعليمات البنك المركزي- معارف بابا" وهتكرره في الاستمارة فوق الست مرات وهتمضيه في نموذج توقيع صغير ويفضل تصوره بالموبيل لان التوقيع دا حساس جدا ومن غيره راحت فلوسك ياعم صابر
* عملنا طلب فتح حساب الكتروني وبيخليك تكتب الايميل وبيقولك هيجيلك ايميل وكلمة سر علي رقمك السعودي
* بعدين بيكتبلك رقم حسابك (من خمس ارقام ) واسم الفرع اللي اخترته علي كرت صغير ويقولك روح حول لحسابك اكتر من 500 دولار 
* تنزل الدور التاني هتلاقي تحويل الراجحي تاني شباك فيه واحد مصري لو معندكش كرت للمجموعة هيقولك روح اعمله بصورة الاقامة في السريع
* تديله الكرت والفلوس وهو الراجل عارف ان دا فتح حساب جديد في بنك فيصل
* بصراحة احنا استغربنا المفروض ان التحويلات بقت سريعة يعني الحوالة بتوصل في 24 ساعة لمصر واحنا لما سالنا الجماعة فوق الحساب هيكون فعال في مصر امتي قالوا 12 يوم والالكتروني اسبوعين تقريبا طيب الفلوس دي ازاي تنزل في حسابنا وهو لسه مشتغلش --> سالنا فوق قالوا الحوالة بتوصل البنك والفلوس بيتم حجزها عشان الارقام دي محجوزة لمكتب السعودية.
* بتديهم فوق صورة الحوالة وشكرا علي كده.
* رقم الحساب بينزل عندك في المستفيدين بتوع حساب الراجحي لكن مش عارف عملية التحويل نفسها بتنزل ولا لأ ... عموما متحولش اكتر من 9 الاف دولار في الشهر لان علي حد علمي ان العمليات اكتر من 9 الاف دولار تحويل في الشهر يتم ابلاغ اجهزة الرقابة علي غسيل الاموال للتعامل معها والتحقيق فيها دا بالنسبة للسعودية.
* علي ما اتذكر انهم قالوا مصاريف فتح الحساب 60 جنيه و 20 جنيه عشان الالكتروني.
* منتظر الرسالة والايميل وهعرفكم بالجديد

* لكن اولا واخير التجربة العملية خير برهان وسانقلها لكم عند اكتمالها باذن الله

============= التحديث ==============

* طبعاً انا انتظرت يبعتوا الرسالة والايميل ومفيش فايدة من الاتنين صحبي جاله بعد 4 ايام تقريبا وانا مجاش حاجة فانتظرت لما تم اسبوع واتصلت بيهم في جدة قالوا بعتنا الاوراق بس ممكن مندوب الشرقية لاني فاتح حسابي في فرع الزقازيق مارحش القاهرة لان المندوب بينزل بالاوراق للقاهرة وبعدين مندوب كل بنك بيروح يجيب اوراق البنك بتاعه ويظبط الحسابات.

* انتظرتهم يومين تلاتة كمان وجيت متصل بفرع البنك في الزقازيق فقالي الايميل ورقم الموبيل فيهم خطأ دا بعد اما عرف رقم الحساب مني واسم صاحب الحساب

* قالي عشان تصلحهم لازم تبعت ايميل لمدير فرع الزقازيق بتغيير الايميل ورقم الموبيل

* انا بعت ايميل مكتوب بالكي بورد واتصلت فقالي الموظف لا اكتب ورقه وخدها سكان (صورة) وابعتها علي الايميل

* المهم ارسلت صورة الخطاب موقع بالتوقيع المعتمد وبالفعل تاني يوم جت الرسالة والايميل

* لما جيت افتح الحساب من علي الخدمة الالكترونية لموقع بنك فيصل كان بيعمل خطأ ودا لاننا كنا بندخل للموقع من جوجل كروم فلما دخلنا من الاكسبلورر دخل عادي

* لقينا الفلوس اللي اتحولت ناقصة رسوم للحساب وموجود بواقي بالمصري في الحساب

* صحبي نزل لفرع المنصورة بيقول الفرع زحمة شوية ممكن تاخد ساعتين لغاية الدور والموظفين تعاملهم عادي وسحب فلوسه كلها عادي وبيقول بطاقة ماكينة السحب الالي بتاخد من عشرين يوم لشهر للاصدار.

* تجربة ممتعة مع بنك فيصل الاسلامي

** استلمت من 3 ايام جواب الحساب من بنك فيصل علي البيت

** رحت للبنك عشان اسحب فلوس وعادي جدا بتستلم رقم يجي دورك تدخل علي الشباك وتديله البطاقة الشخصية ورقم الحساب وتقوله عاوز اسحب مبلغ قيمته كذا هو بيشوف الحساب علي الكمبيوتر وعلطول بيعدلك الفلوس ويخليك تمضي علي الايصال

كيف تختار السيراميك الارضيات ؟

كيف تختار السيراميك او ارضيات شقتك ؟
المعلومات في هذا المقال مبنية علي اني لفيت ع السيراميك وقريت ع النت وقابلت صنايعية وبياعين وناس مركبين عندهم

بص يامعلم م الاخر عاوز تشتري سيراميك اشتري كيلوباترا وانا مش اخوان علي فكرة هههههه
(لا بجد مش اعلان لكن بعد اما طلع عيني في البحث والتمحيص مع الصنيعية ودا كان في منتصف 2012 لان ممكن ينزل انواع احسن من كيلوباترا او حتي مستوى كيلوباترا يتدنى او تتحسن انواع موجودة بالاسواق )
لكن لحد علمي وبحثي كله بيشكر في النوع اللي هو وكيل له لكن معظم الصنيعية وليس كلهم بيشكروا فيها او بيشتكوا من قوة السيراميكة وخامتها الصلبة .

*  بص فيه سيراميك ب 14 ونص المتر (جنيه مصري اسعار منتصف 2012) و دا بتشتري حاجة اسمها بالت -البالت دي ياسيدي كانها مكعب كبير مقفول يعني مجموعة كراتين علي طبيلية خشب - دي فرزة رابعة ودي ارخص حاجة في السوق المصري (ارخص حاجة ماسكة بعضها لاني عرفت ان فيه كسر بلاط ارخص منها ) 
البالت دي  بتشتريها غميضي - وانته مغمض مش ثقة لكن حظ - وبيبقي محطوط فيها كراتين ... كرتونة واحد مفتوحة من جمب واحد باين فيها بلاطة واحدة تشتري البالت بدون ما تفتح اي كرتونة - فقط اللي البائع فاتحها - ممكن باقي الكراتين عدا البلاطة اللي شوفتها يطلعوا اي لون ممكن تطلع تشكيلة الوان او سيراميك او ناقصة او زايدة ممكن تطلع كلها سليمة او كلها مكسرة عدا اللي شوفتها 
البائع مبيرضاش تفتحها حتي لو هتزوده ف المتر خمسة جنينه والبالت دي بتبقي 84 متر

* الناس في الطبيعي بتشتري بالكرتون ... هو اصلا المقاس بتاع الارضية بيبقي بالمتر بس بيقربلك لاقرب عدد كراتين ... الكرتونة بتبقي ساعات 1.44 م ودا بيختلف حسب مقاس السيراميكة وعدد البلاطات في كل كرتون وساعات متر وربع

* ملحوظة : الصنيعية بيقولوا علي قطعة السيراميك الواحدة بلاطة ... انا بقول سيراميكية ساعات وبلاطة ساعات عشان محدش يتلخبط :)

* طبعا فيه فرزات وفيه انواع كتير

* الانواع الشعبية : زي سيراميك الفا - الامير - اوراسمكو - مارينا

* الانواع العالية : زي الجوهرة و كيلوباترا

* الانواع الوسط : زي لابوتيه والفراعنة

طبعا التصنيف دا من وجهة نظري فقط ولا تعتمد الا علي تصنيفي واسئلتي الغير مهنية

* اسمع القاعدة الاساسية الاولى : الفرز الثالث في الانواع العالية كثيرا ما يكون اجود من الفرز الاول في الانواع الشعبية

* عيوب الشعبي : الفرز التاني فيه بيبقي فيه اخطاء واضحة جدا في السيراميكة يعني تلاقي خط ماشي فيها او تلاقيها منقطة او ماشابه ذلك او حتي تلاقي خدوش عيب تصنيع 

كمان فيه مشكلة ممكن تحصل بعد تركيبه بفترة انه ممكن يغير الوان والمشكلة انه مش كله بيغير الوان يعني ممكن خمس بلاطات والباقي زي ماهو

سعر الفرز التاني في الشعبي بيبدأ من 22- 24 جنيه مصري ع المتر (اسعار منتصف 2012) وطبعا لو انته خايف من تغيير الالوان او العيوب بتاعته هتجيب فرز اول بسعر 27-32 للمتر (جنيه مصري اسعار منتصف 2012)

* الانواع العالية : الفرز التالت فيه بيظهر فيه عيوب زي خدوش ف البلاطة 

نصيحتي الاخيرة : دي فلوس بتندفع ياعم الحج فلازم تتصرف صح

كيف تختار الباب والشباك ( النجارة ) ؟

الابواب و الشبابيك ( النجارة ) :
اختيار نجارة شقتك :

*  هتدخل في بتاع 4 الاف (جنيه مصري اسعار النصف الاولي لعام 2012) من غير المقابض والترابيس ومن غير التركيب (30 جنيه تركيب للحتة) 

* اطلع معرض اتفرج لوحدك او يكون معاك حد معرفة وتكون عارف الشبابيك والبيبان اللي هتحتاجها وتاخد عرض اسعار

* متاخدش عربية معاك واعمل حسابك انك هتروح مرة تانية تاخد النجارة ودا عشان ميتضحكش عليك وتضطر تقبل بالموجود طبعا بالاضافة للاستعجال اللي هيحصل عشان وجود عربية عمالة تعد فلوس وسواق مستعجل عاوز يخلص مشواره يعني تروح مرة تسعير ومرة شرا

* متخدش نجار معاك لان النجار لو راح معاك من اول مرة هيبيعك لصاحب المعرض وهياخد فلوس (ممكن 200 جنيه دخان) او حتي باب او شباك هدية علي قفاك ودا هيترتب عليه انك تاخد بسعر غالي وبضاعة مش كويسة عشان كدا روح وشوف وخد النجار معاك في وقت الشراء بس

* التانية روحوا بالنجار بس مواصلات متخدوش عربية ربع نقل ف التانية خدو رقم تليفون سواق بس وري النجار اللي اخترته وسعره مناسب بعدين ادفع وطلع حاجتك بالظبط ولازم تقف علي كل باب عشان الحاجة متتغيرش بعدين اتصل ع العربية تيجي تشيل وتنقل

* ملحوظة : متجبش ابواب للمطابخ لان المطابخ معدش حد بيشتري ليها ابواب عشان خاطر الباب بيضيق المساحة والمطبخ المدام هتفضل طالعه نازلة فمش هتفضل كل شوية تقفل ولو حابب تشتري باب عشان امان للاطفال بعدين ميلعبوش في انبوبة الغاز او البوتجاز ممكن تشتري باب اوكرديون ودا باب زي اللي موجود في غرف قياس الملابس بالمحلات ومبيخدش مساحة وسعره ارخص من الباب الخشب حوالي 150 جنيه تقريبا ( فيه انواع طبعا اغلي بكتير من الابواب الخشب) ولو حمامك ضيق ممكن تجيب باب اوكرديون له وطبعا الباب الاوكرديون او الجر موجود عند بتوع السيراميك والادوات الصحية واحيانا بتوع الحدايد والبويات ونادرا ما يكون عند ورش الالوميتال

* حلق الابواب طبعا البرواز الخشب اللي بيبقي في الحيطة دا هاته رفيع والافضل اسال اسطي المحارة وهو هيقولك تجيب كام سنتي بالظبط د هيوفر عليك موت في المحارة عشان السنتيمتر الزيادة بيضطر اسطى المحارة  يزود سنتيمتر  في العارضة (الحيطة) كاملة دا طبعا في حلوق الابواب والشبابيك كمان ( تفسير الكلام : فيه سماكة thikness للحيطة ممكن حلق الباب يكون اكبر من سمك الحيطة فهيكون خشب الحلق ظاهر من الناحية دي ومن الناحية دي بينما الطبيعي ان خشب حلق الباب بيبقي ماشي مع المحارة كانهم قطعة واحدة  طبعا لو الحلق كبير فهيكون ظاهر فهيخلي بتاع المحارة يتقل في الاسمنت اللي علي الحيطة عشان يخليهم متساويين طبعا السنتيمتر بيكلف كتير يعني السنتيم في 12 متر مربع -للحيطة الواحدة- يعني يكلفك متر وربع مونة تقريباً يعني فوق شكارتين اسمنت عند كل باب او شباك -متر وربع في عشر قطع- يعني تخش ف نص طن اسمنت اقل حاجة

النجار طبعا مبيبقاش عارف الحاجات دي - او مش شاغل باله - يعني اللي مركب لينا الابواب نجار خبرة وقال لا دي عادي وكويسة ويادوب في حين اسطي المحارة قال روحوا قصوا الزيادة اللي في الحلوق هتكلفكم ومشينا علي راي النجار ولبسنا ياعم دي استشارة ببلاش اسطي محارة من بلدكم  او اللي انتوا هتجيبوه

* طبعا فيه اختلاف ف اسعار الخشب لكن الفرق الحقيقي بيبقي ف نوعية الابواب يعني ابواب الاوض مثلا الحديثة اغلي من القديمة يعني مثلا : الباب بتاع الاوض اللي بيبقي زي الابلاكاش بتلقيه مفرغ من جوا ولوح ابلكاش الناحية دي ولوح الناحية التانية الحديث بقي خشب عادي عامل زي باب الشقة كدا يعني ابواب الاوض بقت زي ابواب الشقق .... فيه خشب بيبقي رفيع -في النوعيات الرديئة- ودا مش كويس لانه مع الوقت بيلب -ويلب دي يعني ميقفلش كويس من تحت - كانه بيتلوح شوية كدا

* الاسعار التقريبية للنجارة الجاهزة ( اوائل 2012 جنيه مصري ) :
باب الشقة ب 300
باب الاوضة ب 240
الشباك ب 220 (انا عملت شباك عمولة زاد 20 جنيه عن الجاهز )

• اتمنى ان تستفيدوا من تلك المعلومات ولا تنسوني من صالح دعواتكم لي ولاهلي ولكافة المسلمين