اشاعة : كيف تعرف ان المرايا تكشف ما ورائها

{ معلومة مهمّة } !

كيف تعرفون ان الـمرايا تكشف ماورائها
في غرف تبديل وتغيير الـملابس
في الـمحلات والـمولات ودورات الـمياه وخصوصاً للنساء !

لكي تعرفي اذا كانت المرآه حقيقية ام لا ..
يرجو وضع اصبعك علي المرآة

اذا وجدتي ان أصبعكِ ملتصق بالمرآة تماما كما في الصورة الاولي
فهذا يعني انها مرآه حقيقيه وآمنه .. :)

اما اذا وجدتي فراغ بين اصبعك والمرآه كما في الصوره الثانية
فهذه مرآه ذو اتجاهيين ويمكن للطرف الاخر رؤيتك
فلا تستخدمي هذا المكان .. :( !

على كل رب أسرة أو زوج أو أخ
تعليم أهله كيفية كشف المرايا
------------

وكعادتنا في اعادة انتاج الشائعات الاجنبية فهذه الاشاعة اجنبية المصدر - لا حول ولا قوة الا بالله - حتي الاشاعات بقينا نستوردها من بره ... جتنا نيلة في حظنا الهباب ... أمة (إقرأ) تستورد الاكاذيب
المهم عشان اعصابنا متتعبناش ع الفاضي
الاختبار بتاع الاصبع دا ( finger nail test ) دا اختبار يستخدم للتفريق بين انواع المرايا
هي المرايا انواع ... ايون
بدل ما تدخلي محل وتعملي الاختبار الفاشل اللي فوق وتلاقي فراغ بين صباعك والمرايه فتقومي مصوته ولامة علي صاحب المحل الناس ويقوم الراجل موريكي ان مفيش حاجة ورا المرايا ويتفضح جهلك قدام الناس .. طبعا اتحدث الي الفتيات والنساء لانهن من يقمن بذلك الاختبار
المرايا ياست الكل نوعين:
1- مرايا أولية السطح : ودي اللي صباعك بيبين ان مفيش فراغ وبيكون متلاصق تماما ودي مرايا غالية وبتستخدم في الحاجات العالية زي الادوات الطبية والليزر وماشابه عشان كده صعب جدا تلاقي النوع دا في المحلات العادية ودورات المياه
2- مرايا ثانية (وليست ثنائية)  السطح : ودي بتبقي عبارة عن طبقة قزاز وبعدين على ضهره مادة عاكسة ودي بقي رخيصة وعلى قد ادين البياعين.
فقبل ما تصوتي افتكري ان الراجل غلبان ومش قادر يشتري مرايا من الغالية فابقي ارحميه من الفصال تكسبي ثواب فيه.

طيب بالنسبة للي خايفة تتصور او ان حد يتجسس عليها ودا حقها طبعا انها تحافظ على خصوصيتها

اولا : موضوع منع التجسس وسط التقنيات الرهيبة اللي احنا وسطها صعب جدا
يعني فيه اقلام جواها كاميرات وفيش كهربا ولميات اضاءة وحتي زراير في الملابس 

ثانيا : بالنسبة للي خايفة من المرايات فممكن بسهولة انك تتعرفي عليها في خطوات بسيطة وهي كالاتي :
1- جربي اختبار الاصبع اللي في الاشاعة ولقيتي مفيش فراغ بين صباعك وبين المرايا يبقى يجوز انك تقلقي لان صعب حد يكلف نفسه مراية من الغالية جوا محل لمجرد المقاس .. بس لازم تلحظي انك ممكن يحصل نوع من عدم الدقة في الاختبار لانه بيتاثر بحجم المراية وقوة الاضاءة وحتي باعتبارات شخصية بين الافراد.
2- مرايا التلصص اللي ممكن حد يراقبك من خلالها يتم وضعها داخل الحائط يعني بتبقي عاملة زي الشباك بينما المرايات العادية بتبقي متركبة ع الحائط من بره بمسمار او حامل فلو رفعتي المرايا ولقيتي الحائط خلفها فاكيد دي مش مرايا مراقبة.
3- ممكن تطفي النور - بس طبعا منصحكيش تقولي اطفي النور لصاحب المحل عشان ميفهمش غلط :) او يطلبلك البوليس - وتنوري كشافك او حتي اضاءة الموبيل وتوجهيه للمرايا هتلاقي الغرفة اللي وراها ظهرت لو كانت مراية مراقبة.
4- حطي ايدك ع المرايات واقفليها كويس وسيبي مكان لعينك وحاولي تبصي للناحية التانية فلو فيه اضاءة ولو خافتة في الغرفة التانية هتشوفيها.

5- خبطي علي المرايا بايدك وشوفي الصوت لو فيه صوت مكتوم معناه انها متعلقة علي حائط انما لو فيه صوت زي الطبلة يبقي وراها فراغ غرفة.

المصادر :
http://www.snopes.com/crime/warnings/mirror.asp
http://www.wikihow.com/Tell-if-a-Mirror-Is-Two-Way-or-Not

اشاعة : جورج وسوف أعتنق الإسلام بعد ما عوفي من مرضه

الشائعة:

الكذب مصدره مجلة روتانا 

بعد رحله مع الضيااااااع

ورحله مع الأوجااااااااع

كان الشفاء مرساه علي شط النجاه

الله أكبر الله أكبر و لله الحمد

جورج وسوف أعتنق الإسلام بعد ما عوفي من مرضه، أدرك أن الله الواحد الأحد هو الذى بيده الشفاء وأن الإسلام هو دين الراحة والسعادة والاطمئنانقد أدرك انه بسنة الحبيب العدنان سيصل الى جنة الرحيم الرحمنقد تعب وسئم الحياة فهو كان لا يجد الا الشقاء والعناء والألم المرير بداخله يؤنبه ويقسو عليه فى كل لحظة

فالحمد لله الذى جعل ديننا هو ملاذ الخائفين وسعادة الأشقياء

احيانا يتم وضع صور اخري بجوار الشائعة للمطرب جورج وسوف يظهر فيها مرتديا الزي الخليجي

الرد على الشائعة :

اولا : اسلام اي شخص كان مشهورا او مغموراً هو شئ جيد ويفرحنا

ثانياً : الكذب باسلام اشخاص لم يسلموا هو شئ يفعله اما شخص غير مسلم هدفه الاستهزاء بالمسلمين او شخص مسلم ضعيف العقل يعتقد بانه بكذبه سيفرح المسلمين

ثالثاً : واضح ان اسلام شخص مشهور مثل جورج وسوف كان سيتم اعلانه بقوة ان حدث

رابعا: ربنا يهدي الجميع للاسلام ويعزهم به

المراجع :

http://www.coptstoday.com/General-Misc/Detail.php?Id=10149

http://www.gn4me.com/gn4me/details.jsp?artId=4104822

اخيراً رجعت للنظام القديم

اخيراً رجعت للنظام القديم
انا تركت النظام القديم قبل كده
وكمان كنت بدعي الناس انها تجرب نظام جديد
كتير من الناس كانت فاهمة ان مفيش الا النظام القديم
اي نعم انا عمري ما اشتريت النظام القديم لكن كنت بستخدمه احياناً عشان امشي شغلي وحياتي
للاسف قدر النظام القديم يكون هو الوحيد الظاهر للناس
ناس كتير عارفة عيوبه وعارفه انه ممكن يتجسس عليهم وممكن يكون سبب في مشاكل كتير
انا خيرت كتير عشان اغير لنظام تاني من دمي وفلوسي وكنت هضيع كل حاجة وانا بحط النظام الجديد
اي نعم كان نفسي احط نظام تاني غير النظام الجديد اللي حطيته
بس ناس كتير قالوا ان النظام الجديد اللي حطيته هو المستقبل وهو اكبر منافس حقيقي للنظام القديم
ف الاخر اكتشف انه معندوش برامج لاي حاجة ويفضل يعمل حاجات كتيرة بتكلفني ومبحسش باي تغيير بعدها
هو الصراحة شكله اجمل بكتير من القديم بس ادء زي الزفت
استهلاك غريب للموارد وكل شوية عاوز حاجة جديدة واحتاس لما اعوز اعمل حاجة بسيطة يلففني كتير عشانها
حتى لما حبيت اضيف حاجات مهمة الاقيه مش عامل حسابه فيها ولازم مية لفة عشان اعملها
طبعا كتير فهمني غلط
انا قصدي ع الويندوز واللينكس اوبنتو

watch free movies 24 hours - all new

if you want  to watch new movies just get out of cinema 

just move your satellite dish toward the nilesat satellite 

(the nilesat is egyptian satellite)

you can see its coverage area from here

http://www.nilesat.com.eg/CoverageArea.aspx

then turn this channel on "Panorama Action"

https://www.facebook.com/pages/Panorama-action/135000236553065

Channel Data

Channel : Panorama Action

Freq. : 12341

Pol. : H

FEC : 3/4

Encr : no

Satellite:104

 

Enjoy 24hrs of new movies for free

all movies have Arabic subtitles

كيف تختار السيراميك الارضيات ؟

كيف تختار السيراميك او ارضيات شقتك ؟
المعلومات في هذا المقال مبنية علي اني لفيت ع السيراميك وقريت ع النت وقابلت صنايعية وبياعين وناس مركبين عندهم

بص يامعلم م الاخر عاوز تشتري سيراميك اشتري كيلوباترا وانا مش اخوان علي فكرة هههههه
(لا بجد مش اعلان لكن بعد اما طلع عيني في البحث والتمحيص مع الصنيعية ودا كان في منتصف 2012 لان ممكن ينزل انواع احسن من كيلوباترا او حتي مستوى كيلوباترا يتدنى او تتحسن انواع موجودة بالاسواق )
لكن لحد علمي وبحثي كله بيشكر في النوع اللي هو وكيل له لكن معظم الصنيعية وليس كلهم بيشكروا فيها او بيشتكوا من قوة السيراميكة وخامتها الصلبة .

*  بص فيه سيراميك ب 14 ونص المتر (جنيه مصري اسعار منتصف 2012) و دا بتشتري حاجة اسمها بالت -البالت دي ياسيدي كانها مكعب كبير مقفول يعني مجموعة كراتين علي طبيلية خشب - دي فرزة رابعة ودي ارخص حاجة في السوق المصري (ارخص حاجة ماسكة بعضها لاني عرفت ان فيه كسر بلاط ارخص منها ) 
البالت دي  بتشتريها غميضي - وانته مغمض مش ثقة لكن حظ - وبيبقي محطوط فيها كراتين ... كرتونة واحد مفتوحة من جمب واحد باين فيها بلاطة واحدة تشتري البالت بدون ما تفتح اي كرتونة - فقط اللي البائع فاتحها - ممكن باقي الكراتين عدا البلاطة اللي شوفتها يطلعوا اي لون ممكن تطلع تشكيلة الوان او سيراميك او ناقصة او زايدة ممكن تطلع كلها سليمة او كلها مكسرة عدا اللي شوفتها 
البائع مبيرضاش تفتحها حتي لو هتزوده ف المتر خمسة جنينه والبالت دي بتبقي 84 متر

* الناس في الطبيعي بتشتري بالكرتون ... هو اصلا المقاس بتاع الارضية بيبقي بالمتر بس بيقربلك لاقرب عدد كراتين ... الكرتونة بتبقي ساعات 1.44 م ودا بيختلف حسب مقاس السيراميكة وعدد البلاطات في كل كرتون وساعات متر وربع

* ملحوظة : الصنيعية بيقولوا علي قطعة السيراميك الواحدة بلاطة ... انا بقول سيراميكية ساعات وبلاطة ساعات عشان محدش يتلخبط :)

* طبعا فيه فرزات وفيه انواع كتير

* الانواع الشعبية : زي سيراميك الفا - الامير - اوراسمكو - مارينا

* الانواع العالية : زي الجوهرة و كيلوباترا

* الانواع الوسط : زي لابوتيه والفراعنة

طبعا التصنيف دا من وجهة نظري فقط ولا تعتمد الا علي تصنيفي واسئلتي الغير مهنية

* اسمع القاعدة الاساسية الاولى : الفرز الثالث في الانواع العالية كثيرا ما يكون اجود من الفرز الاول في الانواع الشعبية

* عيوب الشعبي : الفرز التاني فيه بيبقي فيه اخطاء واضحة جدا في السيراميكة يعني تلاقي خط ماشي فيها او تلاقيها منقطة او ماشابه ذلك او حتي تلاقي خدوش عيب تصنيع 

كمان فيه مشكلة ممكن تحصل بعد تركيبه بفترة انه ممكن يغير الوان والمشكلة انه مش كله بيغير الوان يعني ممكن خمس بلاطات والباقي زي ماهو

سعر الفرز التاني في الشعبي بيبدأ من 22- 24 جنيه مصري ع المتر (اسعار منتصف 2012) وطبعا لو انته خايف من تغيير الالوان او العيوب بتاعته هتجيب فرز اول بسعر 27-32 للمتر (جنيه مصري اسعار منتصف 2012)

* الانواع العالية : الفرز التالت فيه بيظهر فيه عيوب زي خدوش ف البلاطة 

نصيحتي الاخيرة : دي فلوس بتندفع ياعم الحج فلازم تتصرف صح

كيف تختار الباب والشباك ( النجارة ) ؟

الابواب و الشبابيك ( النجارة ) :
اختيار نجارة شقتك :

*  هتدخل في بتاع 4 الاف (جنيه مصري اسعار النصف الاولي لعام 2012) من غير المقابض والترابيس ومن غير التركيب (30 جنيه تركيب للحتة) 

* اطلع معرض اتفرج لوحدك او يكون معاك حد معرفة وتكون عارف الشبابيك والبيبان اللي هتحتاجها وتاخد عرض اسعار

* متاخدش عربية معاك واعمل حسابك انك هتروح مرة تانية تاخد النجارة ودا عشان ميتضحكش عليك وتضطر تقبل بالموجود طبعا بالاضافة للاستعجال اللي هيحصل عشان وجود عربية عمالة تعد فلوس وسواق مستعجل عاوز يخلص مشواره يعني تروح مرة تسعير ومرة شرا

* متخدش نجار معاك لان النجار لو راح معاك من اول مرة هيبيعك لصاحب المعرض وهياخد فلوس (ممكن 200 جنيه دخان) او حتي باب او شباك هدية علي قفاك ودا هيترتب عليه انك تاخد بسعر غالي وبضاعة مش كويسة عشان كدا روح وشوف وخد النجار معاك في وقت الشراء بس

* التانية روحوا بالنجار بس مواصلات متخدوش عربية ربع نقل ف التانية خدو رقم تليفون سواق بس وري النجار اللي اخترته وسعره مناسب بعدين ادفع وطلع حاجتك بالظبط ولازم تقف علي كل باب عشان الحاجة متتغيرش بعدين اتصل ع العربية تيجي تشيل وتنقل

* ملحوظة : متجبش ابواب للمطابخ لان المطابخ معدش حد بيشتري ليها ابواب عشان خاطر الباب بيضيق المساحة والمطبخ المدام هتفضل طالعه نازلة فمش هتفضل كل شوية تقفل ولو حابب تشتري باب عشان امان للاطفال بعدين ميلعبوش في انبوبة الغاز او البوتجاز ممكن تشتري باب اوكرديون ودا باب زي اللي موجود في غرف قياس الملابس بالمحلات ومبيخدش مساحة وسعره ارخص من الباب الخشب حوالي 150 جنيه تقريبا ( فيه انواع طبعا اغلي بكتير من الابواب الخشب) ولو حمامك ضيق ممكن تجيب باب اوكرديون له وطبعا الباب الاوكرديون او الجر موجود عند بتوع السيراميك والادوات الصحية واحيانا بتوع الحدايد والبويات ونادرا ما يكون عند ورش الالوميتال

* حلق الابواب طبعا البرواز الخشب اللي بيبقي في الحيطة دا هاته رفيع والافضل اسال اسطي المحارة وهو هيقولك تجيب كام سنتي بالظبط د هيوفر عليك موت في المحارة عشان السنتيمتر الزيادة بيضطر اسطى المحارة  يزود سنتيمتر  في العارضة (الحيطة) كاملة دا طبعا في حلوق الابواب والشبابيك كمان ( تفسير الكلام : فيه سماكة thikness للحيطة ممكن حلق الباب يكون اكبر من سمك الحيطة فهيكون خشب الحلق ظاهر من الناحية دي ومن الناحية دي بينما الطبيعي ان خشب حلق الباب بيبقي ماشي مع المحارة كانهم قطعة واحدة  طبعا لو الحلق كبير فهيكون ظاهر فهيخلي بتاع المحارة يتقل في الاسمنت اللي علي الحيطة عشان يخليهم متساويين طبعا السنتيمتر بيكلف كتير يعني السنتيم في 12 متر مربع -للحيطة الواحدة- يعني يكلفك متر وربع مونة تقريباً يعني فوق شكارتين اسمنت عند كل باب او شباك -متر وربع في عشر قطع- يعني تخش ف نص طن اسمنت اقل حاجة

النجار طبعا مبيبقاش عارف الحاجات دي - او مش شاغل باله - يعني اللي مركب لينا الابواب نجار خبرة وقال لا دي عادي وكويسة ويادوب في حين اسطي المحارة قال روحوا قصوا الزيادة اللي في الحلوق هتكلفكم ومشينا علي راي النجار ولبسنا ياعم دي استشارة ببلاش اسطي محارة من بلدكم  او اللي انتوا هتجيبوه

* طبعا فيه اختلاف ف اسعار الخشب لكن الفرق الحقيقي بيبقي ف نوعية الابواب يعني ابواب الاوض مثلا الحديثة اغلي من القديمة يعني مثلا : الباب بتاع الاوض اللي بيبقي زي الابلاكاش بتلقيه مفرغ من جوا ولوح ابلكاش الناحية دي ولوح الناحية التانية الحديث بقي خشب عادي عامل زي باب الشقة كدا يعني ابواب الاوض بقت زي ابواب الشقق .... فيه خشب بيبقي رفيع -في النوعيات الرديئة- ودا مش كويس لانه مع الوقت بيلب -ويلب دي يعني ميقفلش كويس من تحت - كانه بيتلوح شوية كدا

* الاسعار التقريبية للنجارة الجاهزة ( اوائل 2012 جنيه مصري ) :
باب الشقة ب 300
باب الاوضة ب 240
الشباك ب 220 (انا عملت شباك عمولة زاد 20 جنيه عن الجاهز )

• اتمنى ان تستفيدوا من تلك المعلومات ولا تنسوني من صالح دعواتكم لي ولاهلي ولكافة المسلمين

ابكو معي علي منتديات ملتقي اهل الحديث

تحديث : الحمد لله الملتقي رجع 

اللهم لك الحمد كما ينبغي لجلال وجهك وعظيم سلطانك

--------------------------
اخواني
يحزنني ان انقل لكم عن خبر اغلاق منتديات ملتقي اهل الحديث
والله لقد احزنوا قلبي باغلاقهم لها وتركهم لاسم المنتدي وما يترتب عليه من فقدان موضوعات جبارة

والله لقد خسرنا موقعاً قوياً في نقل العلم الشرعي
والوم صاحب المنتديات الذي تخلي عنها وعنٌا فان كان عن نقص مال فلماذا لم يبلغنا نحن رواد المنتدي
وان كان عن نقص وقت وانشغال فالكثير من الاخوة كانوا باستعداد قيامهم بذلك العمل
حقيقة انا لا اجد عذراً مقبولاً لترك المنتدي واغلاقه بهذا الشكل
وارجو من صاحب المنتدي او القائم عليه ان يكون لديه نسخة من الموقع واستكمال مسيرة المنتدي

Www.ahlalhdeeth.com

اشاعة : بطاقات الاتصال و كروت الشحن نيتروكسيد الفضة اكسيد النيتروجين

‎.يؤسفني نقل هذا الخبر لكن
.
.
....
.
وجدت هيئة البحوث الطبية في الولايات المتحدة
أن سرطان جديد قد يصيب الانسان تسببه مادة "نيترو أكسيد الفضة".
كلما قمت بشراء بطاقات إعادة شحن او بطاقات الاتصال
...لا تقم بحكها بواسطة الظفر لأنها تحتوي على طلاء 'الفضة أكسيد النتروجين'
ويمكن أن يسبب سرطان الجلد.

انشر وساهم في نشر الوعي ..

-------------------------------

طبعا زي ما قلتلكم قبل كدا انا موتي وسمي موضوع انشر وشارك الجهل دا

ليه ؟؟؟

انا مش غاوي جهل

بس المصيبة ان اللي بينشر عامل زي اللي بينشر غسيل وسخ مش بيشم الريحة ولا بيقلب في الهدوم اللي بينشرها

يلا بينا نقلب احنا

لتس جوجل ات

يعني يلا نجوجلها ( نبحثها في جوجل )

recharging card cancer

لقينا الاشعاة مالية النت بشكل غبي وموقع هوكس سلاير ( قاتل الاشاعات ) متكلم عنها بالتفصيل الممل وبيقول :

ان المعلومات اللي في الرسالة دي غير صحيحة وان الطبقة اللي بتغطي الارقام في بطاقات الشحن هي عبارة عن حبر جلدي خاص وانه لا يوجد مادة تحت اسم نيتروكسيد الفضة اصلا ولم يجد اي تقارير او تحذيرات طبيه بتربط بطاقات الشحن او احبارها بسرطان الجلد 

ولو عاوز تقرا المزيد دوس علي كلمة موقع هكوس سلاير وهتلاقي تفصيل لكل جملة في الاشاعة وعلي فكرة مفيش هيئة اسمها هيئة البحوث الطبية بالولايات المتحدة 

( ممكن فيه حاجات بالاختصاص نفسه ودا اكيد لكن مش بالاسم )

** اضافات عربية :

طلاء الفضة اكسيد النيتروجين :

طلاء الفضة ودا زي الفل ( مع اني عمر ما سمعت عن مركب كيميائي اسمه طلاء الفضة اكسيد النيتروجين)

انما بالنسبة لاكسيد النيتروجين فيوجد اما :

- اكسيد النيتريك (نيتريك مونو اكسيد ) : ودا غاز

- ثاني اكسيد النيتروجين : غاز سام

- اكسيد النيتروز : غاز الضحك

طبعا كل اسم غاز معاه الرابط بتاعه وواضح انهم غازات.

ملاحظات حول الاشاعة :

- ان الاجانب سبقونا بيها من زمان واحنا مجرد ترجمنها ودا ممكن بسبب ان الموبيلات ظهرت هناك الاول او يكون بسبب ضعف متحدثي الانجليزية عندنا وقرأ تكذيب الاشاعة واعتقد انها سليمة او واحد قرأ الاشاعة الاجنبي ومتأكدش منها بحكم انها بالانجليزي فبالتالي الاجانب مبيغلطوش او واحد بيعرف انجليزي كويس وعرف انها اشاعة وبردوا اصر ينقلها لينا عشان يضحك علينا شوية

اشاعة : احذروا العلامة الحمراء على الشيكولاتة

احذروا العلامة الحمراء على الشيكولاتة

على البونتي وكذلك توجد في بعض أصناف منتجات شركة مارس العالمية مثلا مارس

وسنيكرس .... الرجاء النظر للخلف تحت الطية فإن وجدت العلامة فهي تعني لا

تصلح لاستهلاك المسلمين لأنها تعني أن هذا المنتج قد إستخدم في صنعه

زيوت الخنزير الشركة قد وضعت هذه العلامة ليست للمسلمين

وإنما للمسيح النباتيين اللذين لايأكلون اللحوم 

،،،، أنشر للتحذير والدال على الخير كفاعلة

****************************

انا بصراحة قرأت الاشاعة علي مشاركة بعض الاصدقاء علي الفيس بوك واللي اصبح الراعي الرسمي للاشاعات او للشائعات 

وانا بصراحة عندي حساسية لكلمة  " انشر للتحذير والدال علي الخير كفاعله " طبعا مش قصدي كلمة الدال علي الخير كفاعله ولكن قصدي الاسلوب اللي هدفه حث اي شخص علي النشر .... طبعا انتوا فاهمين قصدي انا لا اعادي اي دين فازاي هعادي الاسلام وانا مسلم والحمد لله

المهم نرجع مرجوعنا

احنا طبعا بنعامل اي اشاعة علي انها حقيقة وبنحاول نتثبت من كل كلمة

نروح علي حبيب المليارات جوجل ونبحث عن العلامة الحمراء

red dot inside a red square

بعد بحث اقل من خمسة عشر دقيقة لقينا الموضوع علي مدونة مسعود  باللغة الانجليزية ويشرح الموضوع بكامله وينصح بعد نشر الموضوع وبصراحة كان نفسي اترجم كل اللي كتبه ليكم

الهدف انه بيقول ان حاجة زي دي مش هتعدي علي شركة مارس واكيد هتعمل تصريح عنها علي الموقع بتاعها وبالفعل ناسخ التصريح

ودا رابط للتصريح  وهو من علي الموقع الرسمي لشركة مارس 

التصريح اهو 

Statement on “red dot” label on Mars chocolate products in Egypt   Mars products always comply to the legal and cultural norms of all the markets it does business in. Mars products, including Snickers, Bounty and Mars bars do not contain pork nor pork derivatives.  Mars products are exported to a number of markets, of which India is one; the red dot that may appear on some of our packaging is a legal requirement for the Indian Market. It indicates that the product may contain egg, which is not suitable for some vegetarians in India. Still, to further clarify the matter, we are currently completing the process of separating the packaging for the two markets which will minimize future misunderstanding. 

الترجمة

تصريح عن " النقطة الحمراء" الموجودة علي شيكولاته مارس في مصر

منتجات مارس دائما تتطابق مع الطبائع القانونية والثقافية لكل الاسواق التي تعمل بها. منتجات مارس بما فيها سنيكرز ، بونتي ، و قوالب شيكولاته مارس لا تحتوي الخنزير ولا مشتقات الخنزير. منتجات مارس تصدر الي عدة اسواق ومن بينها الهند والنقطة الحمراء التي تظهر علي بعض مغلفاتنا متوجبة قانونا للاسواق الهندية. انها توضح ان المنتج قد يحتوي البيض والذي يعتبر غير مناسب لبعض الناس الذيت يتبعون حمية (نظام غذائي) للخضار فقط في الهند. ولكن ولكي يتضح الموضوع مستقبلا فنحن الان نكمل العملية لفصل المغلفات للسوقين - يقصد الهند ومصر - والتي سوف تقلل سوء الفهم مستقبلاً.

-----------------------

ملاحظات علي الاشاعة :

1- اذا كان هناك شئ خاص بغير المسلمين هل تعتقد ان السلطات لن تجعل التحذير يظهر بشكل مرئي في بلد اغلبية مسلمة .

2- بيقولك اذا وجدت العلامة فمعني ذلك ان المنتج صنع من زيوت الخنزير .... فيها حاجة اسمها زيوت الخنزير ... يعني صاحب الاشاعة جاهل بشهادة ... طيب يقول دعن الخنزير او شحم الخنزير انما زيت خنزير .... كويس انه مش قال عصير خنزير.

3- بيقولك المنتج صنع للمسيحيين النباتيين ... طيب افهم انا بقي دي .... حاجة بجد تجنن هل المسيحي النباتي غير المسلم النباتي - يعني اذا كان فيه مسلمين نباتيين - او ملحد نباتي ياعم بلاش مسلم نباتي ... ولا الملحد عنده الخنزير حرام طيب بالنسبة للهندوسي والبوذي ..... الاعجب بقي واحد نباتي بصرف النظر عن ديانته هياكل لحم خنزير ولا شحم خنزير ولا زيت خنزير وهو نباتي ؟؟؟!!!!

الحمد لله اني مش صحفي

طبعا انا مش بعيب علي الصحفيين ولكني احمد الله اني لم اكن صحفيا 

لاني بصراحة لو كنت صحفي كنت هكون - حلوة كنت هكون دي - افشل صحفي

فالصحافة مهنة متعبة بحق 

كيف يكون لديك معين لا ينضب من الافكار ومؤنة مستمرة من الصبر علي الرد او متابعة موضوعات بعينها

فحتي وان كنت عشقت مكافحة الشائعات وكتابة بعض المقالات - اليتيمة واللي ممكن تودينا علي محاكمة عسكرية - فلا اجد صبرا علي الكتابة ولا وقتا للمثابرة علي الرد عليها

لكن 

واه من لكن دي

لكن بصراحة الاشاعات كترت وريحتها بقت وحشة لدرجة ان الانترنت بقت ريحته وحشة 

بس خلاص 

انا جيت

هيصوا ياعيال