الثلاثاء، 28 مايو 2013

( تحديث ) عمل حساب في بنك مصري للمصريين المغتربين في السعودية

كيفية فتح حساب في بنك يعمل في مصر للمواطنين المصريين الذين يعملون بالمملكة العربية السعودية :
-----------------------------------------------------------------------------------
الكثير من مواطني جمهورية مصر العربية يعملون بالخارج ويزعم البعض ان نسبة المواطنين 10% من عدد السكان في مصر بما يقارب من حوالي اكثر من 9 مليون مصري يعمل منهم اكثر من 2 مليون مواطن بالمملكة العربية السعودية.
قد تفاجأ عزيزي الفاضل انك اذا اردت فتح حساب في بنك مصري مثل البنك الاهلي المصري، بنك مصر، بنك كريدي اجريكول، بنك الاهلي سوسيتيه جنزال nsgb، بنك hsbc فلن يمكنك فتحها من داخل المملكة العربية السعودية.
ولكن احب افرحك اخي العزيزي ان هناك طريقة.
انتظر، انها ليست تلك الطريقة التي ستجدها في اغلب نتائج البحث على موقع جوجل العزيز. (علي جميع المنتديات الا منتدي صغير يتحدث عن الاوعية الادخارية ويضمن الحل عفواً وسط الكلام)
- انها ليست ان ترسل بريد الي احد مديري فروع بنك مصر او بنك فيصل الاسلامي ( لن تجد اي رد عليك الا من مدير بنك فيصل الاسلامي الذي سيحل لك الموضوع .. سانقل لك الحل لاحقأً .. علي سبيل التشويق يعني :) )
- وليست ايضا ان تحضر الي احد ممثلي البنك الاهلي المصري او مندوبي بنك مصر في المملكة العربية السعودية المتواجدين ببعض افرع البنوك السعودية. ( فبعد اتصال مع ممثلي البنك الاهلي بالمملكة اكتشفنا انهم لا يقومون بفتح حسابات ولكن فقط بمتابعة مشاكل الحوالات وقال احدهم ان المملكة منعتهم من فتح حسابات بالمملكة http://www.nbe.com.eg/Default.aspx?AID=7&CID=8)
- بالتأكيد البنوك التي تعمل هنا في السعودية ولها افرع في مصر هي بنوك عالمية ولكن لا يمكنك ادارة حسابك من الافرع المصرية (عن الادارة الكاملة اتحدث من سحب وتحويل وكشوف حسابات )
* طيب الحل ايه ( ترارارااااااااا ) :
الحل الوحيد هنا هو مكتب علاقات بنك فيصل الاسلامي المتواجد بعمارة الملكة بجدة الدور الثامن عشر تليفون رقم 02-6448490
موظف محترم يستقبل المكالمات 
* المطلوب: - بطاقة الرقم القومي/أو جواز السفر  - مبلغ 500 دولار او اكثر -مشوار الي جدة لفتح الحساب
* يقول الموظف بانه يتم فتح الحساب في نفس الوقت ولكن لايمكنك استلام بطاقة سحب الاموال من الماكينة الالكترونية (بطاقة الصراف الالي) ATM او بطاقة الائتمان
* على حد قول الموظف يمكنك تعبئة طلب تفعيل الخدمة الالكترونية لمطالعة حسابك ، والحقيقة لا ادري مدي خدمات بنك فيصل الاسلامي الالكترونية وان كانت تبدو انها غير مبشرة بالمرة حيث اننا وجدنا الموقع لا يفتح لمدة يومين وسمعت انه لا يتوافق مع بعض برامج التصفح فتجد بعض الروابط لا تعمل
* صديقي قام بمخاطبة مدير احد افرع بنك فيصل الاسلامي وهو الذي اوضح انه يمكن فتح الحساب ورد المدير في وقت قصير واعاد صديقي طلب وسائل الاتصال وعنوان المكتب في السعودية وتمت اجابته وفي وقت قصير

(تحديث) لما رحت لمكتب الامير محمد بن فيصل بن عبدالعزيز ال سعود في الدور ال 18:
* استخدمنا خرائط جوجل والتنقل عشان نوصل google maps + navigation موجودة علي جوالات الاندرويد وع الايفون  (https://goo.gl/maps/m6tyZhUM2m52)  .. ابحث بكلمة ( عمارة الملكة ) عموما هي في مدخل جدة من ناحية مكة عند ميناء جدة الاسلامي والجي بي اس هيوصلك لغاية الباب.
* متنستناش توصل لغاية العمارة عشان مفيش مواقف تابعة ليها او قدامها مباشرة لكن فيه فندق البحر الاحمر قدامه مواقف قليلة بس هتلاقي مكان ان شاء الله او لما الموبيل يقولك باقي 500 متر اركن في اول موقف واتمشي لغايتها.
* اركب الاسانسير (المصعد/اللفت) لغاية الدور ال 18 
* لو لقيت باب المكتب مقفول خبط وافتح عادي متخفش.
* مصريين محترمين جداً
* طلبنا فتح حساب وافونا بالاوراق طبعا لابد من بطاقة الرقم القومي الاصل او جواز السفر الاصل وهيسالك عاوز في اي فرع
* تحتاج عنوان في مصر او صندوق بريد في السعودية عشان كل اربع شهور هيجيلك تقرير الحساب علي العنوان ممكن تعمل حاجة اسمها حفظ مراسلات تمنع البريد البنكي لكن بيكلفك فلوس ولازم تروح البنك مرة واحدة في السنة علي الاقل.
* لازم تكون بتعرف توقع ايوا توقع يعني تمضي ومش فورمة لا تكتب اسمك ثنائي او ثلاثي يعني مثلا (محمد احمد) "تعليمات البنك المركزي- معارف بابا" وهتكرره في الاستمارة فوق الست مرات وهتمضيه في نموذج توقيع صغير ويفضل تصوره بالموبيل لان التوقيع دا حساس جدا ومن غيره راحت فلوسك ياعم صابر
* عملنا طلب فتح حساب الكتروني وبيخليك تكتب الايميل وبيقولك هيجيلك ايميل وكلمة سر علي رقمك السعودي
* بعدين بيكتبلك رقم حسابك (من خمس ارقام ) واسم الفرع اللي اخترته علي كرت صغير ويقولك روح حول لحسابك اكتر من 500 دولار 
* تنزل الدور التاني هتلاقي تحويل الراجحي تاني شباك فيه واحد مصري لو معندكش كرت للمجموعة هيقولك روح اعمله بصورة الاقامة في السريع
* تديله الكرت والفلوس وهو الراجل عارف ان دا فتح حساب جديد في بنك فيصل
* بصراحة احنا استغربنا المفروض ان التحويلات بقت سريعة يعني الحوالة بتوصل في 24 ساعة لمصر واحنا لما سالنا الجماعة فوق الحساب هيكون فعال في مصر امتي قالوا 12 يوم والالكتروني اسبوعين تقريبا طيب الفلوس دي ازاي تنزل في حسابنا وهو لسه مشتغلش --> سالنا فوق قالوا الحوالة بتوصل البنك والفلوس بيتم حجزها عشان الارقام دي محجوزة لمكتب السعودية.
* بتديهم فوق صورة الحوالة وشكرا علي كده.
* رقم الحساب بينزل عندك في المستفيدين بتوع حساب الراجحي لكن مش عارف عملية التحويل نفسها بتنزل ولا لأ ... عموما متحولش اكتر من 9 الاف دولار في الشهر لان علي حد علمي ان العمليات اكتر من 9 الاف دولار تحويل في الشهر يتم ابلاغ اجهزة الرقابة علي غسيل الاموال للتعامل معها والتحقيق فيها دا بالنسبة للسعودية.
* علي ما اتذكر انهم قالوا مصاريف فتح الحساب 60 جنيه و 20 جنيه عشان الالكتروني.
* منتظر الرسالة والايميل وهعرفكم بالجديد

* لكن اولا واخير التجربة العملية خير برهان وسانقلها لكم عند اكتمالها باذن الله



============= التحديث ==============


* طبعاً انا انتظرت يبعتوا الرسالة والايميل ومفيش فايدة من الاتنين صحبي جاله بعد 4 ايام تقريبا وانا مجاش حاجة فانتظرت لما تم اسبوع واتصلت بيهم في جدة قالوا بعتنا الاوراق بس ممكن مندوب الشرقية لاني فاتح حسابي في فرع الزقازيق مارحش القاهرة لان المندوب بينزل بالاوراق للقاهرة وبعدين مندوب كل بنك بيروح يجيب اوراق البنك بتاعه ويظبط الحسابات.

* انتظرتهم يومين تلاتة كمان وجيت متصل بفرع البنك في الزقازيق فقالي الايميل ورقم الموبيل فيهم خطأ دا بعد اما عرف رقم الحساب مني واسم صاحب الحساب

* قالي عشان تصلحهم لازم تبعت ايميل لمدير فرع الزقازيق بتغيير الايميل ورقم الموبيل

* انا بعت ايميل مكتوب بالكي بورد واتصلت فقالي الموظف لا اكتب ورقه وخدها سكان (صورة) وابعتها علي الايميل

* المهم ارسلت صورة الخطاب موقع بالتوقيع المعتمد وبالفعل تاني يوم جت الرسالة والايميل

* لما جيت افتح الحساب من علي الخدمة الالكترونية لموقع بنك فيصل كان بيعمل خطأ ودا لاننا كنا بندخل للموقع من جوجل كروم فلما دخلنا من الاكسبلورر دخل عادي

* لقينا الفلوس اللي اتحولت ناقصة رسوم للحساب وموجود بواقي بالمصري في الحساب

* صحبي نزل لفرع المنصورة بيقول الفرع زحمة شوية ممكن تاخد ساعتين لغاية الدور والموظفين تعاملهم عادي وسحب فلوسه كلها عادي وبيقول بطاقة ماكينة السحب الالي بتاخد من عشرين يوم لشهر للاصدار.

* تجربة ممتعة مع بنك فيصل الاسلامي

** استلمت من 3 ايام جواب الحساب من بنك فيصل علي البيت

** رحت للبنك عشان اسحب فلوس وعادي جدا بتستلم رقم يجي دورك تدخل علي الشباك وتديله البطاقة الشخصية ورقم الحساب وتقوله عاوز اسحب مبلغ قيمته كذا هو بيشوف الحساب علي الكمبيوتر وعلطول بيعدلك الفلوس ويخليك تمضي علي الايصال






هناك 27 تعليقًا:

Unknown يقول...

الله ينور عليك لكن هل ممكن سحب فلوس من فرع مصر وانت هنا فى السعوديه؟

طبيب بيطري يقول...

انته اللي هتسحب؟
طيب هتسحبهم منين اللي في السعوديه دا مكتب علاقات عامة وليس بنك باي شكل

Unknown يقول...

واية اللي ياكل ليك تعمل كدة ما قبل ما تطلع من مصر تقتح حسابك المصري والدولار انا فاتح ف البنك الاهلي المصري فرع طنطا خدمة ممتازة الاهلي اون لاين شغال تمام وممكن اتمام تحويل من حساب الدولار الس المصري عن طريق التليفون وممكن سحب من الصرافات ف السعودية بال atm
بس بياخد عمولة لكن عن تجرية بسحب واشتري شبكة بيها بدون اي عمولة بسعر الصرف بس

محمد علي يقول...

اخواني الاعزاء انا عايز افتح حساب بالدولار ايهم افضل بنك فيصل فرع طنطا ولا البنك الاهلي المصري حساب ادخاري اللي بيعطي ارباح كل 3 شهور مع امكانيه السحب والايداع في الحساب في اي وقت ويريت اللي يعرف يفدني عن نسبه الارباح في كل بنك اكون شاكر له ويريت حد يفيدني عن بعض الكلام اسمعه الان ان البنوك في مصر تماطل العملاء في الحصول علي الدولارات وان اعطتهم الدولارات تعطيهم ورقه 10 دولار حتي لايستطيع ان يغيرها من السوق السوداء ياريت يا اخواني اللي عنده فكره ومعلومات اكيده يرد عليه للاهميه القصوي ولكم جزيل الشكر علما انني الان موجود بالسعوديه

محمد علي يقول...

اخواني الاعزاء انا عايز افتح حساب بالدولار ايهم افضل بنك فيصل فرع طنطا ولا البنك الاهلي المصري حساب ادخاري اللي بيعطي ارباح كل 3 شهور مع امكانيه السحب والايداع في الحساب في اي وقت ويريت اللي يعرف يفدني عن نسبه الارباح في كل بنك اكون شاكر له ويريت حد يفيدني عن بعض الكلام اسمعه الان ان البنوك في مصر تماطل العملاء في الحصول علي الدولارات وان اعطتهم الدولارات تعطيهم ورقه 10 دولار حتي لايستطيع ان يغيرها من السوق السوداء ياريت يا اخواني اللي عنده فكره ومعلومات اكيده يرد عليه للاهميه القصوي ولكم جزيل الشكر علما انني الان موجود بالسعوديه

وصفات دلع كرشك يقول...

طيب بنك مصر ممكن اعمل حساب من السعوديه

وصفات دلع كرشك يقول...

طيب بنك مصر ممكن اعمل حساب من السعوديه

Dr.M.Lotfy. يقول...

لو فنحت حساب فى جدة كما ذكرت حضرتك..هل يمكن أن ينزل معاشى على هذا الحساب فى مصر؟

Unknown يقول...

عايز أَسحب من حسابي من بنك فيصل مبلغ وانا هنا بالسعوديه

Unknown يقول...

عاوز ايمل بنك فيصل الاسلامى فرع جده

Unknown يقول...

عاوز ايمل بنك فيصل الاسلامى فرع جده

Unknown يقول...

لو سمحت يا اخي انا فاتح حسابي بالمصري وضيفت نفسي كمستفيد بس انا دخلت الباص ورد خطأ في الاهلي نت اون لاين وقالي لازم تكلم خدمه العملاء في البنك علشان يشيلو البلوك علشان الرقم كان خطأ لو حضرتك معاك رقم تليفون فرع للبنك الأهلي المصري او تليفون ليهم وشكرا لحضرتك....

Unknown يقول...

عاوز عنوان مندوب بنك فيصل في الرياض او رقم التليفون

Unknown يقول...

السلام عليكم عاوز افتح حساب فى البنك الاهلي وانا مقيم فى السعودية فى مدينة أبها كيف الطريقة


Unknown يقول...

لو سمحت عاوز اعمل اون لاين وعاوز يجيلى رساله على تلفونى وقت الوداع او سحب من الفيزه او الصراف وسجل رقمى السعودى هل ممكن وده مجانا والا عليه مدفوعات الخدمات ديت عليها فلوس والا مجانيه وشكرا ولكم الشكر والتقدير

Unknown يقول...

السلام عليكم عايزه اعرف ايه البنوك الموجوده في مصر وليها فروع بالسعوديه وجزاكم الله خيرا

Unknown يقول...

لو سمحتم عايز رقم المكتب اللي في جدة بالله عليكم علشان اعرف اتواصل معهم

Unknown يقول...

لو سمحتو حد يفيدني عايز افتح حساب في مصر والنا في السعوديه ينفع ولا لا

Unknown يقول...

ياريت حد يفيدنا

Unknown يقول...

السلام عليكم ورحمة الله وبركاته
التليفون المسجل للمكتب ده غير صحيح الرجاء تصحيحه

Unknown يقول...

فيصل الاسلامي

Unknown يقول...

مفيش طريقه من الرياض؟؟ هل ممكن حد غيري يقوم بالنعمه دي في جده؟؟

Unknown يقول...

لو سمحتم عايز افتح حساب في فيصل من المدينة المنورة

Unknown يقول...

لو سمحتو هل احد يعرف مندوب لبنك مصر في الرياض يرسلي رقم جواله

Unknown يقول...

هل ما زال متوفر الخدمه فتح حساب حد يفدنا

Unknown يقول...

فين رقم مندوب بنك مصر فالدمام واسمه ايه

أبو عمر المصري يقول...

محدش بيرد على حد