كيف اترجم ويكيبيديا؟

خطوات ترجمة ويكيبيديا سهلة جدا وتكون كالاتي:

1- ادخل علي موقع ويكيبيديا الانجليزي ( http://en.wikipedia.org )

2- ابحث باللغة الانجليزية عن موضوع تهتم به مثلا ( Earth Observing System )

3- انظر الي الجهة اليسري للصفحة ستجد اللغات ( قد تجد اللغة العربية او لا ) لكننا لا نجد اللغة العربية (*)

4- افتح موقع ويكيبيديا العربي في لسان tab جديد وابحث بالمعني العربي للكلمة ( نظام مراقبة الارض )

5-يظهر كلمة باللون الاحمر ( نظام مراقبة الارض ) اضغط عليها لانشاء المقال باللغة العربية

6- سيتم تحويلك الي ساحة التحرير ويفضل ان يكون لديك حساب مجاني علي ويكيبيديا العربية ( تستطيع عمله خلال ثواني ) واذا لم يكن لديك حساب سيتم اخذ عنوان الاي بي لكي يتم تسجيل التحرير به

7- ساحة تحرير المقال هي مجرد مكان فارغ يتسع لكتاباتك اما بالنسبة لتنسيق المقال فقط اهتم بالعناوين الرئيسية والفرعية

8 -العنوان الرئيسي يكتب هكذا بدون الاقواس (==العنوان الرئيسي==) والعنوان الفرع هكذا بدون اقواس (===العنوان الفرعي===)

وكلما اردت عنوانا فرعيا اكثر فوم بزيادة هذه العلامة علي الجانبين بدون اقواس(=)

9- ظلل الكتابة الانجليزية وانسخها ( تظليل +كليك يمين ثم نسخ )، او (تظليل ثم زر كنترول ctrl  +c)

10 - ترجم ثم احذف النص الانجليزي

11- يمكنك الاستعانة بخدمة الترجمة لجوجل ( http://www.google.com.sa/language_tools?hl=ar )

12- يمكنك الاستعانة ايضا برابط لمساعدتك في التنسيق ( http://alturl.com/t868f )

13- بعد اكمال جزء او كل الترجمة انسخ ما ترجمته والصقة في ملف نص ( حتي لا ينقطع النت ويضيع مجهودك هباء ) ثم اضغط زر " احفظ الصفحة " في صفحة التحرير ويكيبيديا

14 - ملحوظة لا تكتب اسمك كنوع من الاعلان لان المقالات يتم مراجعتها من قبل مراقبين وسيتم حذف اي كلمات ليس لها علاقة بالمقالة

(*) اذا وجدنا اللغة العربية نفتحها في لسان جديد tab واذا وجدت المقالة غير مكتملة فاضغط علي زر ( عدل ) ثم بعد اضافة المعلومات الجديدة اضغط علي زر " ارسل التغييرات "

مشروع ترجمة ويكيبيديا

الموسوعة الحرة

ويكيبيديا أو الموسوعة الحرة : هي عبارة عن مشروع الهدف منه مشاركة الثقافة حول العالم فهي مجموعة مقالات مترابطة

نشأت الموسوعة الحرة بالانجليزية لكنها الان تشمل معظم اللغات في العالم ان لم يكن جميع اللغات المنطوقة

المقالات باللغة الانجليزية تزيد عن 3 ونصف مليون

عدد مقالات اللغة الانجليزية

المقالات باللغة العربية حوالي 150 الف مقال فقط

المشكلة ان هناك نقص شديد في المقالات باللغة العربية في حين وجود اعداد ضخمة من المقالات بالانجليزية

فالمقالات بالعربية حوالي 5% من المقالات الانجليزية في حين متحدثي العربية اكثر من 400 مليون بالنسبة الي متحدثي الانجليزية 500 مليون شخص فمن المعقول ان تكون نسبة المقالات العربية 80% وليس تلك النسبة المخزية

اللغة العربية تقع في الترتيب الثالث حسب المقالات في الويكبيديا

اللغة العربية تقع في الترتيب الثالث

وتتفوق علينا اللغة الهولندية والاسبانية والايطالية وكثير من اللغات يكفي ان تعرف ان اللغة التركية تتفوق بعدد مقالاتها عن اللغة العربية علما بان متحدثي اللغة التركية حوالي 100 مليون شخص

هدفنا ترجمة اكبر قدر ممكن من المقالات للغة العربية

الامر يحتاج فقط معرفة باللغة الانجليزية ووصلة انترنت

ملحوظة الموسوعة مجانية اي انك تضمن ان مقالات سيتم عرضه مجانا ولن يتم بيعه للمستخدمين

ترجم قدر ما تستطيع ولو سطر واحد

واعلم جيدا ان رسول الله - صلي الله عليه وسلم - قال " إِذَا مَاتَ الْمُؤْمِنُ انْقَطَعَ عَمَلُهُ إِلا مِنْ ثَلاثٍ : صَدَقَةٍ جَارِيَةٍ ، أَوْ عِلْمٍ يُنْتَفَعُ بِهِ ، أَوْ وَلَدٍ صَالِحٍ يَدْعُو لَهُ " .

لن يضيع وقتك هباء ان شاء الله

شكرا لجيش مصر الوطني العظيم

بصراحة انا مجاليش نوم وفضلت شايل الهم لغاية لما البلوجر رجع تاني بالسلامة 
وعشان كدا لازم اشكر القوات المسلحة علي اقرارها بحق المغتربين في التصويت

طبعا فيه ناس خبيثة انا والحمد لله مش منهم بيقولك ان الاخبار اللي بيتم تسريبها عبارة عن بالونة اختبار لردود الافعال
بس لا انا مش معاهم في البالونة انا مقتنع ان دا حقنا ان احنا نصوت

 دا هصوووووووووووووووت لغاية لما اشبع تصويت

مدونتي اتسرقت ولا بتستعبط ؟

انا طول عمري ظن السوء بيغلب علي الظن الحسن 

يعني فيها ايه لما اكون كاتب موضوعين بيلعن ابو الحكومة - مع احترامي لهم - ويتحذفوا والمدونة تتقفل

انا علي طول الوسواس الخناس اشتغل في مخي ان الدنيا خربت وخلاص الجيش كلم جوجل - قال يعني الجيش معاهم رقمهم اساسا بس ممكن كلموا وائل غنيم وخدوا الرقم منهم - وحذفوا المواضيع من ع المدونة - قال يعني انا مهم اصلا ولا حد بيدخل ع المدونة غيري -  وشكلي هتحاكم محاكمة عسكرية وهلبس سنتين زي الواد المدون اللي لبس سنة في السجن ( هو لبسهم عشان كان عاوز اسرائيل تساعده بروح والدته ) 

واكتملت عندي عناصر نظرية المؤامرة ان الجيش عميل والحكومة عميلة وعصام شرف عميل وانا نفسي عميل

عبط بعيد عنك  - لا تتعجب انها ارادة الله -.

بحث علي جوجل

المهم وانا داخل اصور بقي ما اهو انا عملت ولا بيل جيتس - مش وزير دفاع امريكا لا دا بتاع ميكروسوفت اللي كان اغني واحد في العالم بس بعد ثروة بابا حسني عرف انه يدوب علي قد حاله ومش عارف ازاي بابا حسني بابا وهمليش ورث فيه ولا هو بابا حسني زي علي بابا - ورحت ابحث في جوجل عشان اجيبها من الارشفة وطلعت لسه متأرشفتش واحب ابشركم - ايوا عارف ان محدش بيقراها - خلاص واحب ابشر نفسي اني محطتش الموضوع علي اي مكان تاني لغاية لما وصلت لان البلوجر - اللي هو البلوجر الكبير يعني عم الكل - سقط بيانات المستخدمين وبيحاولوا يرجعوها

الموضوع محذوف

وعلي راي المثل "قليل البخت يلاقي العضم في الكرشة " او كما قال الاستاذ محمد بتاع الرياضيات بتاع الصوفية - رحمه الله واسكنه فسيح جناته - " قليل البخت ... تنطحه الجاموسة وهو فوق السطح "

فانا بفكر انشي صفحة انا اسف يا جيش لاني ظنت فيكم سوء

بس تقريبا جيشنا علي نياته وامه - اللي هي مصر - دعيا له 

والله كنت داخل البلوج عشان اكتب اعتذار للجيش بس مفيش نصيب ومنتظرين اصلاح الحاجة مدونة عشان انا بحب اقول اللي ليا واللي عليا

حالة المدونات انهم بيحاولوا يستردوها

 احنا اسفين يامدونة

الاسباب الخبيثة لـ " منع المصريين بالخارج من التصويت "

حدثني الجزء الخبيث في نفسي حيال اسباب قرار حرمان المصريين المغتربين بالخارج من التصويت في الانتخابات البرلمانية والمتوقع صدوره خلال ساعات قليلة
فقلت نحكي سوا - حلوة سوا دي علي اساس فيه حد بيدخل المدونة غيري - المهم نحكي انا ونفسي يعني

المهم 
تضافرت الاسباب الزبالة في نفسي مع بعض الاخبار المريبة لكي تخرج في مخي فكرة احقر من الاتنين وراء منع المصريين بالخارج من التوصيت في الانتخابات البرلمانية
الاخبار كانت وعود الدكتور عصام شرف بضمان حق التصويت للمصريين بالخارج - اخبار حوادث الانفلات الامني وتراخي الشرطة الغير مبرر ومتقوليش خايفين من الناس - كمان خبر لسه النهاردة بدراسة قانون للسماح لرئيس الجمهورية او رئيس الوزراء بقطع الاتصالات بدون الرجوع لمجلس الشعب والشوري - كمان بعض المواد التي اضيفت للاعلان الدستوري بعد الاستفتاء عليه - اختفاء اخبار الرموز السياسية زي البردعي لغاية المستشار الخضيري - ظهور الاخبار التافهة بتاعة مرتضي منصور وما شبهها - عمل قوانين اعتمادا علي سلطة المجلس العسكري المستمدة من الاعلان الدستوري دون مراجعة بعض القوي المدنية طبعا مفيش لا مجلس شعب ولا شوري - اخبار جودت الملط والفضايح بتاعة القمح الفاسد - محاكمة رموز النظام الفاسد علي مخالفات مالية وعلي فكرة الموضوع دا كان بيحصل ايام مبارك بس في السكرته - السر يعني - وكان الوزير اللي بيخرج من الوزارة بيلعب في فريق طرة للمحترفين - تأخر صرف التعويضات للمضارين من احداث الثورة- التمثيل الدبلوماسي المصري لم يتغير الا في الوزير المحترم لكن باقي الجسد زي ما هو

طيب ايه الافكار اللي لسعت في مخك - بكلم نفسي - ياعم الحج؟
اقولك ياسيدي
بحسابات بسيطة كدا تلاقي ان المصريين في الخارج حوالي 10% من الشعب المصري- طبعا كانوا بيقولوها الاول بالفم المليان لكن دلوقتي ساعة منع الانتخابات بقوا 4 مليون -.المهم انهم حقيقة بيمثلوا حوالي 8 مليون مصري

يعني :
1- عدد 8 مليون مصري بالخارج
2- حوالي 80% واكثر متعلمين
3- حوالي 80% منهم لهم حق التصويت
4- حوالي 20:30% منهم عايشين في دول ديمقراطية يعني عايشين التجربة وبيعرفوا الديمقراطي من وشه والدكتاتور من وشه
5- حوالي 80:90% منهم عايشين في بلاد متقدمة اقتصاديا وتكنولوجيا
6- حوالي 90% منهم لا يحتاجوا خدمات يعني مش عاوزين لا رعاية صحية ولا دعم لمواد تموينية ولا وظائف داخل الدولة 
7- حوالي 30% منهم غير محتاجين لخدمة التعليم الجامعي في مصر
8- عدد المشاركين في الاستفتاء في مصر كانوا اقل من 18.5 مليون مصري ( دا كان في ظل الحماس الوطني والضغط الاعلامي للمشاركة والضغط الديني كمان يعني في افضل الحالات التي مرت علي مصر )
9- عدد المشاركين من المصريين بالخارج في اي انتخابات حوالي 6 مليون قول هيشارك 4 مليون يعني حوالي 20% من الكتلة التصويتية للانتخابات
10 - مجلس الشعب مجلس تشريعي هو والشوري بيناقشوا القوانين والموازنة العامة واستجواب الوزراء واستجواب رئيس الجمهورية كمان يعني اقوي سلطة في الدولة ( ايو سامعك في الدول الديمقراطية بس )
11- مصر 40% من الشعب المصري اميين يعني لو طابقت النسبة دي علي عدد المشاركين في الاستفتاء يبقي حوالي 7 مليون مصري ابيض ياورد من المشاركين في الاستفتاء

لوجيت تضرب الارقام علي بعض في الخلاط هتلاقي ان هيبقي عندك عدد مصوتين بدل ما سبعة مليون اميين و11 متعلمين هيبقي عندك 7 مليون اميين وحوالي 15 مليون متعلمين تلت المتعلمين عايشين في بلاد نضيفة
طيب وايه الضرر

انته اهبل بجد دا مجلس الششششششششششعب يعني كل يوم هيطلعلك حد عاوزين نستجوب الوزير الفلاني ، ازاي الميزانية قد كدا واحنا في السعودية الميزانية كدا ومبتعملوش حاجة ، لا القانون دا مينفعش لان بيضر حقوق الانسان وهتبدأ تسمع كلام غريب وممكن يخلي اي دكتاتور يرجع حقوق انسان ومواطنة واحتمال يقعوا في الخطيئة خصوصا لو كانوا يعرفوا حد في اوروبا ويقولوا ديمقراطية


عرفتوا بقي ايه سبب الكابوس بتاع المصريين في الخارج ولاد التييييييييييت 
عرفت ليه المصري معروف عنه انه نصاب وحرامي لان دولته بتقول هيقبض وينتخب


بس لا دي نفسي السيئة لكن الناس دي هتقول ان فيه انتخابات للمصريين بالخارج ان شاء الله

..... والا سنضطر اسفين لاعلان الاحكام العرفية علي الحكومة المصرية

منع المصريين بالخارج من التصويت في الانتخابات

ملحوظة صغننة : بيقولك المصريين اللي في الخارج مش هيعرفوا يختاروا نائب عشان ينفع الناس طيب دي عندي حلها وشكراً علي حسن السؤال .

زي ما فيه نسبة عمال وفلاحيين ومحافظين عليها احنا عاوزين 10 في المية من مقاعد مجلس الشعب لاننا 10% من السكان يعني يطلع لنا بتاع 40 مقعد كدا عشان نعرف نقعد براحتنا كدا حلو

بلاش 40 خليها 20 بلاش طيب 10 بلاش خليها خمسة ويتعمل لها 5 دوائر دولية ويشترط ان اللي يتقدم للعضوية يكون له مش اقل من 5 سنين في الخارج ويكون مش مزدوج الجنسية ويلزم انه يزور دايرته 10 مرات في السنة اظن كدا عدانا العيب وسهلناهلكم ع الاخر

عن جريدة الاهرام 

عدم التصويت للمغتربين

طبعا استند المسئولين - الله يقويهم علي نفسهم - في مصر في قرارهم منع المصريين في الخارج من المشاركة بالتصويت في الانتخابات النيابية علي عدد اسباب جوهرية وهي :

1- عدم توافر عدد كافي من القضاة

2- صعوبة تجمع المصريين في مدن وولايات متفرقة

3- عدم امتلاك البعض منهم لبطاقة الرقم القومي

4- البعض منهم مزدوجي الجنسية

5- عدم معرفتهم بالمرشحين

6- سهولة شراء الاصوات منهم نتيجة للسبب رقم خمسة

طبعاً احنا في مصر عندنا مثل جميل بيقول ( لو كنتوا اخوات اتحاسبوا ) 

طبعا الاخوة في مصر عملوا دراسة مستفيضة - حلوة مستفيضة دي- واسفرت عن هذه النتائج بعاليه

طيب مش ممكن نتناقش شوية يابشمهندسين في ظل الديمقراطية والشفافية والدقهلية واي حاجة بس ابوس ايدكم نتفاهم

اولا حسب الاحصاءات المصريين بالخارج 10% من سكان مصر

طبعا عشان يبقي عندكم فكرة ان اكتر من 70% من العشرة في المية دول في سن الانتخاب 

فاهمني مش كدا

يعني مصر مش كله سن الانتخابات فقول نصهم شباب يعني .... ولا اقولك اسهلهالك

كام واحد شاركوا في الاستفتاء الاخير 18 مليون وفكة

طيب شوف بقي اما تدخل معاهم حوالي 5 مليون هتفرق ولا مش هتفرق

يعني لو شارك 2 مليون من اللي ف الخارج هتلاقي عندك حدود 10% من القوة التصويتية وتوصل لغاية 40% من القوة التصويتية

يعني المفروض احنا حاجة مهمة اهو 

نيجي بقي للاسباب العالمية اللي منعت او هتمنع من وجهة نظرهم وانا لا عالم ولا بتاع علوم سياسية انا مواطن مصري من الطبقة المتوسطة ومسافر بالخارج

1- عدم توافر عدد كافي من القضاة

طيب انتوا بتقولوا في نفس الخبر انكم هتعملوا الانتخابات علي اكتر من مرحلة يعني 2 او 3 ضيف ياسيدي مرحلة زيادة للي في الخارج

بلاش انا اقولك اننا 40 ف المية من الكتلة التصويتة يعني المفروض 40 في المية من القضاة يجوا لغاية عندنا

لكن هنقولك احنا مواطنين مصريين نمثل 10% من سكان مصر ولينا حق في عشرة في المية وزيادة من القضاة ... ليه زيادة عشان احنا مبنستفدش من القضاء المصري حاجة في اي امور تانية يعني قضيانا مش مالية المحاكم ولا كل واحد بينزل يمسك في جاره ويطلعوا ع المحكمة

2- صعوبة تجمع المصريين في مدن وولايات متفرقة

بيقولك كيّف ....... العسل يشتريله معلقة

يعني اللي عاوز يحط صوته وعاوز يشارك يشد علي السفارة او القنصلية اللي في الدولة اللي فيها وانتوا ملكومش دعوة يجي ميجيش براحته ومتشلوش هم المشوار الحساب علينا مش هتدفعوا من جيبكم حاجة

ومش هقول خلوها علي الانترنت للمصريين بالخارج ولا باجهزة الكترونية

3- عدم امتلاك البعض منهم لبطاقة الرقم القومي

مش هقولك انتخب بالجواز ولا بالبصمة

بس اظن ان اللي عاوز ينتخب هيستخرج بطاقة الرقم القومي من السفارة

4- البعض منهم مزدوجي الجنسية

مزدوجي الجنسية اه دي بقي مصيبة سودا مش كدا

اظن يعني ايام المخلوع كانوا بيبقوا اعضاء مجلس الشعب من الهاربين من الجيش ومزدوجي الجنسية

دول هينتخبوا مش هيترشحوا اظن فاهمين الليلة دي علما بان الدستور المصري يسمح بازدواج الجنسية ولو اتغير ياسيدي خليهم ميصوتوش واسقط عنه الجنسية واظن اللي بياخد جنسية لازم موافقة من وزارة الداخلية

5- عدم معرفتهم بالمرشحين ( المصري اليوم )

عدم معرفتهم بالمرشحين ههههههههههههههه اهي دي جامدة جدا لان فيه ناس ي مصر ميعرفوش يقرأو ولا بيعرفوا المرشح

ميعرفوش غير الرمز اللي بيقولوه علم عليه

احنا شايفين كل واحد فيكم ....... بص قدامك ياحرامي

فيه حاجة اسمها ثورة معلومات هي وصلتكم بس انتوا مش واخدين بالكم دي هية اللي خلعت مبارك اصحوا بقي 

6- سهولة شراء الاصوات منهم نتيجة للسبب رقم خمسة (المصري اليوم)

ياتري هيدفعوا بالدولار ولا باليورو

يعني هيدونا 50 دولار مثلا ولا 50 يورو ولا 50 ريال ولا بالدرهم ولا بالفرانك

مع احترامي لكم وللجنة الكريمة اللي استفاضوا في الامور وتقريبا تاهو ميعرفوش ان متوسط دخل المصري بالخارج احسن من مرتب عضو اللجنة اللي قاعد يقرر مصيرنا ويقيس علي نفسه ان كان مستعد يبيع صوته وبكام وياتري هيجولنا ازاي ويعتروا علينا ازاي ولا هيقولوا مؤتمر لشراء اصوات المصريين بالخارج 

دي مصر شرا الاصوات فيها بالكوم بلاش تقولوا الحته دي اصلها عليكم مش ليكم

من الاخر هناخد حقنا في التصويت في الانتخابات البرلمانية والرئاسية

وبدون استعمال اسلوب ضغط

اشاعة: هل تعرف معني كلمة bye ؟

اشاعة: هل تعرف معني كلمة bye ؟

سؤال غريب واكيد اجابته هتكون اغرب ولازم هتدور عليها عشان تقراها وتتنطط علي صحابك

وتكون الاجابة فعلا مثيرة تناسب طبعك الشبابي الكووول او طبعك الرصين الرزين او حتي طبعك - ولا مؤاخذة مش انته يعني - الجاهل عشان تحس انك بقيت عالم

الاجابة بتاعتهم ( يعني اللي حاطين الموضوع بدل ما تقولوا دا مش مسلم ) : 

نحن المسلمون نقلد الأربيون دون أن نعلم ماذا نفعل . ويقول رسول الله صلى الله عليه... وسلم . الإنسان يقول كلمة لا يلقي لها بال(  تهوي به الى 70 طائفة في النار. ومعنى كلمة (باي) هي دمت في رعاية البابا وحفظه ونحن الأن نشرك بالله دون أن نشعر.... وبدل ما نقول دمت في رعاية الله وحفظه نقول دمت في رعاية البابا و حفظه و الاسوء أننا نعلمها لأولادنا و...ربما تكون هي أول كلمة نعلمها لأطفالنا عندالنطق ....يقول الله تعالى .(إن الجاهل يعذر على جهله) وأتمنى أن لا نكررها بعد الأن . أنشرها بقدر ما إستطعت . وتخيل كم ستنقد من مليون مسلم . وبإذن الله ستكون في ميزان حسناتك . وجزاك الله خير ملاحظة الدال على الخير كفاعله والدال على الشر كفاعله.)

-----

مبسوط كدا ظبطتك وهترسم علي صحابك دور المثقف ياعم الحج

----

طيب ما تيجي ندور عليها احنا بدل ما ناخد المعلومة ع الجاهز

كلمة باي bye

وجوجل حبيب الملايين اكتب فيه 

source of bye word

هيطلعلك ان مصدرها في عدة مواقع تبحث اصول اللغة الانجليزية زي ما احنا عندنا مواقع تبحث اصول اللغة العربية

This phrase comes from God be with you. It has been shortened over the years since 16th century. Shakespeare used "God be wy you." The substitution for good for God seems to have been mainly due to the influence of such phrases as " good day" and " good night."
يعني بالبلدي كدا العبارة دي معناه ( الاله معاك ) ولما كان عندنا كلمة الله اللي هي اصلا تسهيل لكلمة الاله يبقي معناها ( الله معاك ) مش البابا ولا الماما
====
طيب نرجع عجلة ورا كدا ونشوف الباشا كاتب ايه
- طبعا هو زعلان ان احنا بنقلد الاوربيون وعاوزنا نعتز باللغة العربية مع انه كاتب الاوروبيون غلط 
- الاخ مسلم برضوا بيقول كلمة تلقي في النار سبعين طائفة مسمعش عن سبعين خريفا
- بيقولك يقول الله تعالي ( الجاهل يعذر علي جهله ) في انهي كتاب دي يابشمهندس دي ولا حتي في اولي ابتدائي 
ملحوظة الجاهل لا يعذر بجهله ( فَاسْأَلُوا أَهْلَ الذِّكْرِ إِنْ كُنْتُمْ لا تَعْلَمُونَ ) وخصوصا الجاهل اللي يرد علي الناس اللي بيحاولوا يصلحوا له الكلام

نقول بقي المصادر :
موقع اصل الكلمة
http://www.unm.edu/~dave/words/5-2.html
موقع اللغة الانجليزية واستعمالتها
http://english.stackexchange.com/questions/1505/origin-of-the-word-goodbye
موقع القاموس
http://dictionary.reference.com/browse/good-bye

 وف الاخر احب اقولكم

الاشاعات وصلت للنمل يا رجالة

النمل الناري او نمل النار fire ant والاشاعات 

بعد بحث ع السريع : النمل الناري واسمه كدا عشان لسعته بتتحس كانها كي بالنار يعيش بالقرب من المناطقة الحارة وليس ف النار وبجوار الانهار وفي الحدائق موضوع طول الفوج دا مش لاقيته لاني ببحث ع السريع موضوع مشي علي سلك دي برضوا ملقتهاش طبعا موضوع الحرارة اللي بتتوهج منه دي كلام ف الفاضي طبعا النمل هذا لا يسبب الحرق ولكن اسلوب لسعته تختلف عن النمل العادي يعني هو بيلسع زي النحل له ابرة في بطنه بتطلع سم قاتل للحشرات وله تأثير مضاد حيوي عشان كدا اناث النمل دا بترمي السم بتاعها ع البيض لكي لا يصاب بالميكروبات واللسعة تتسبب بالم شديد وظهور اثار الالتهاب من الورم والاحمرار وتتلاشي خلال يومين اذا لم يتم الهرش فيه واذا حدث الحرش يحدث باستيولا يعني ...... ورم كدا معبي ميه وداخله علي صديد واذا اتفتحت بتسيب اثر او ندبة طبعا يوجد نوع طبيعي من الذباب شبه ذبابة الفاكهة بتقتل النمل دا لانه بتحط البيض بتاعها في قطعة الصدر للنملة الميتة والبيض اللي بيفقس جوا النمل الميتة بتطلع اللارفا تاكل في جسم النملة الميتة طبعا موضوع امريكا حاربته بالقذايف دا كلام فارغ ومبيحصلش لان الدول المتقدمة بتفضل استخدام مقاومة بيولوجية وطبعا وجود الاية في اخر الموضوع لا تعني صحته ... اه صحيح النمل مقره رقم واحد في امريكا لكن تبين وجوده في استراليا والمكسيك ونيوزيلندا وتايوان والصين ..... طبعا لسعة النمل ممكن تؤدي للوفاة في حالتين تجمع عدد ضخم من النمل ولسعه للانسان او الحيوان او يكون فيه حساسية للسم بتاعه ......... طبعا لازم نتعود ان احنا مش عشان قرفانين من امريكا اننا نعرف معلومات غلط وكمان نربطها بالقران لازم نكون ناس عندها حس المعرفة وبتحاول تدور اولا علي صحة المعلومة وثانيا علي الاستزادة منها ......

احلي حاجة الردود

طبعا لازم نسال عن المصدر بتاع المعلومة يعني مينفعش المصدر يكون واحد صحبي ثقة علي راي شيخ يعني صاحبك دا ابن حزم

المهم المصدر بتاعي:

الموسوعة الحرة ويكيبديا

http://en.wikipedia.org/wiki/Fire_ant

للاسف المقال بالانجليزي وعشان كدا كنا بنشجع موضوع تعريب مقالات الويكبيديا عشان نشر الثقافة العربية ومحدش عبرني

موقع اكستنشن ودا زي منضمة للتوعية البيئية

http://www.extension.org/pages/9725/geographic-distribution-of-fire-ants

خدمة البحوث الزراعية الامريكية

http://www.ars.usda.gov/fireant/project.htm

تحت صورة لواحد ايده ملسوعة منل النمل وواضح ان الصورة وهو لسه عايش

عمر علاء مبارك - هذا ما جناه علي ابي .... وجدي

بالتأكيد فصل الطالب/ عمر علاء مبارك من المدرسة لم يستحق كل هذه الضجة من القنوات الاخبارية وبرامج التوك شو
لدرجة ان برنامج احبه ومقدمه احترمه ياتي بهذا الخبر وان كان هدف نبيل فلا يبرر استعمال تلك الوسيلة من ضرب المثل بحفيد المخلوع

فحفيد المخلوع مبارك ليس الا مواطن مصري لا يصح التشهير به والتدخل الغير مبرر في حياته الشخصية وخصوصا اذا كان طفل
فالمدرسة الامريكية - وهنا المفارقة - رئيس الدولة يدخل حفيده مدرسة امريكية لعدم ثقته في المدارس المصرية او ربما لانه يريد لحفيده ان يتعلم الانجليزية جيدا
عموما المدرسة تراجعت عن قرار الفصل لظروف الطفل التي تسببت في عدم حضوره واتمني ان يغلق الموضوع علي ذلك
القصد : لا يصح ادخال الاطفال في التشهير او معاقبتهم بذنب ارتكبه ابائهم و اجدادهم

الدبلوماسية الشعبية والدبلوكاسية الرسمية

لعله عنوان غريب قد حتي لا يحظي باهتمام محرك البحث العملاق جوجل
لكن لعله ايضا يقر واقع لا يستطيع احد ان ينكره
دائما كانت الدبلوماسية الرسمية او الدبلوكاسية هي التمثيل الدولي لمصر حيث يجتمع الوزير الخارجية المصري في العهد الماضي او معاونيه ومساعديه مع الاطراف الخارجية لبحث الحلول والمشاكل واحيانا لعقد الصفقات
- مشكلة النيل

لا استطيع ان انسي مشكلة النيل او ازمة النيل وطلب دول منابع النيل بالتعديل علي الاتفاقية الاثرية للنيل وتقسيم مياه ليحظوا هم الاخرين بنصيب من مياه النيل ولن اتدخل في اذا ما كانت ستحتاج دول المنبع هذه المياه التي يريدون اقامة سدود لتوفيرها ام لا

ولكني سوف انظر للجانب المشرق والمظلم في الموضوع وذلك عندما حاول النظام السابق التعامل مع هذا الملف الذي وصف بالامن القومي والشائك

ماذا فعلت الدبلوماسية الرسمية غير مقارعة الكئوس مع دول المنبع ومع دول اخري غير ذات صلة بالموضوع بدون الوصول لحل للمشكلة

رحنا نهدد ونتوعد وحتي ان اسرائيل طلع لها ايد ف الموضوع حتي لو كان صح طيب احنا عملنا ايه في اي حاجة ويجري وزير الخارجية ابو الغيط ويسبقه مبارك المخلوع ومفيش فايدة وفي الاخر يسلموها لمدير المخابرات مش عارف ليه لدرجة ان الاتفاقية اتوقعت في وقت ثورة مصر 25 يناير

دلوقتي طلع لنا حاجة جديدة اسمها الدبلوماسية الشعبية اكتشفناها متاخرين عن الدنيا كلها
وفد شعبي بسيط من غير رسميات ومن غير السلام الوطني اللي بيرفرف والوفد دا مجموعة من الشباب اللي ممكن يكونوا مش موظفين دولة اصلا بالاضافة الي مرشحين للرئاسة واحد منهم ممكن يفوز وممكن محدش يفوز
يعني ناس علي باب الله كدا بالفلاحي
وبدون القواعد والبروتوكول يروحوا يحلوها في اقل من 3 شهور طبعا مش حل نهائي لكن كان اقصي ما تتمني الدبلوماسية الرسمية ان تفعله فالشباب جعلوا اثيوبيا توافق علي تأجيل التصديق علي الاتفاقية بالاضافة الي السماح بفحص السد الخاص باثيوبيا " سد الالفية"
طيب يعني الناس دي ممكن تفيد اهو وحتي مخدوش مرتب ولا بدل انتقالات ولا وجبات
يعني مصرفوش زي المنتخب اما بيروح دولة تانية وبيجلنا مغلوب وبردوا عملوا حاجة وحاجة جامدة كمان وطلعوا من الموضوع باقتراحات لحل الازمة
في النهاية فيه نقطتين
- اولا اقوله فينك يا مخلوع ويابتوع احنا اسفين ياولاد الوس*ة
- ثانيا الوفد الدبلوماسي الشعبي لازم يفضل كدا محدش يوظف اي حد فيهم عاوزينهم شعبيين علطول ولسه قدامه مهمات اكبر من كدا

اخيرا احب اقول وفق الله مصر